admin
Cornelius Luphahla
IZAKHAMIZI zesigabeni sePhumakanye eLupane sezisungule iphurojekithi yabomama yokufuya inkukhu zesikhiwa kanye lokulima ngenhloso yokuzithuthukisa.
Iphurojekithi yeSibambene isungulwe ngomnyaka ophelileyo ngamalunga amahlanu.
Kubikwa iphurojekithi le ekusungulweni kwayo yayingeyokufuya inkukhu kodwa khathesi isikhangela lezokulima.
UMthunywa uvakatshele kule indawo wakhulumisana lelinye ilunga lale iphurojekithi uNkosikazi Nkosilathi
Khumalo oveze ukuthi iphurojekithi le bayisungula ngenjongo yokuzithuthukisa njengabesifazana.
“Iphurojekithi yethu le sayisungula singomama abahlanu ngenjongo yokuzithuthukisa. Okwakhathesi sifuye inkukhu zesikhiwa ama-broiler angu-150 aselungele ukuthengiswa. Ukudla kwenkukhu zethu sikuthenga eLupane eNational Foods Limited sikuthwale ngenqola,” kuveza uNkkz Khumalo.
Omunye wezakhamizi ezikule iphurojekithi uNkosazana Ndandatho Ncube ubikele uMthunywa ukuthi inkukhu zabo bazithengisa eLupane kukanti ezinye zithengwa yizakhamizi.
“Inkukhu zethu sizithengisela edolobheni leLupane, kubabalisi bePhumakanye kanye lakuzakhamizi zakule indawo.
Khathesi njengoba inkukhu zethu sezilungele ukuthengiswa sikhangelele ukuthi sizithwale sizise eLupane,” kuveza uNkszn Ncube.
Umgcinisihlalo wale iphurojekithi uNkosikazi Liphi Khumalo ubikele intatheli ukuthi uhlupho abahlangana lalo ngolokuswela imota yokuthwala ukudla kwenkukhu zabo.
“Khathesi noma nje iphurojekithi yethu itshengisa ukuthuthuka kodwa uhlupho esilalo yikuthi asilamota yokuthwala inkukhu zethu kanye lokudla kwazo okudala ukuthi siqhatshe imota yokusithwalela ngoba eLupane kungumango ongaba ngamakhilomitha alitshumi.
“Lokhu kwehlisa inzuzo yethu ngakho isifiso sethu yikuthi ngabe inhlanganiso ezizimele zodwa ziyangenela zisincedise kuloluhlupho,” kuphetha uNkkz Mpofu.
Online Reporter