marble nkomo
Sikhumbuzo Moyo
AMALUNGISELELO omkhosi wokuthakazelela uzibuse walonyaka eMaphisa, esabelweni seMatabeleland South, asesiya emaphethelweni nanko sokusele nje umsebenzi wokucina wokukhipha ingcekeza.
Umgubho we-Uhuru walo nyaka uzaqhutshwa ngaphansi kwendikimba ethi: “Zim@46 – Ubunye lokuthuthuka Sisiya kuVision 2030, (Unity and Development Towards Vision 2030).” Indikimba le iqakathekile njalo itshengisa inhloso, sixhumanisa ilifa lenkululeko lezifiso zokuthuthukisa iZimbabwe yalamhlanje.
Abantu abedlula inkulungwane ezingamatshumi amahlanu bakhangelelwe ukubuthana endaweni lapho uMongameli uMnangagwa azakhokhela khona isikhumbuzo lesi ngenkulumo eqakathekileyo.
Ekhuluma engxoxweni ebisendaweni lapho okuzaqhutshwa khona umkhosi kaZibuse uManjinela uSean Mukwamba uthe zonke izinhlelo zizakwenziwa ziphele ngaphambi komcimbi wangoMgqibelo.
“Amalungiselelo omkhosi ozakubakhona ngoMgqibelo esesemaphethelweni. Sokusele nje ukuthi sikhuphe ingcekeza. Sesiqedile ngitsho lokufaka amatende abahlonitshwa kunye lawomphakathi,” kutsho uManjinela uMukwamba.
Uthe izambuzi sezikhona sekusele nje ukuthi kuqediswe ukudonswa kwamagetsi.
“Ngaphandle kwamandla kagetsi, silama-generator amathathu alindile izimo eziphuthumayo,” kutsho uManjinela.
Ukutholakala kwamanzi lakho kulungiswe kuhle. Kufakwe amatanka ayisithupha awama-20 000litres kanye lamanye amathathu okunakekela inkundla azasetshenziswa ukuthi kuthelwe phansi ukuze kungabi lothuli enkundleni.
“Phezulu kwalokho, sekubekwe impompi zamanzi okunatha ezingu-15 enkundleni nje yonke.
“Konke okwamanzi kulungiswe ngabeZimbabwe National Water Authority (Zinwa),” kutsho uManjinela uMukwamba.
Online Reporter