Online Reporter
Nkosilathi Sibanda
EKUPHELENI kwalumnyaka abathandi bezomculo kuleli bazakhwela amatafula, bephose izandla emoyeni begida ingoma kaFab G MshanakaGogo, esihamba phambili kulezinsuku emsakazweni lasenkundleni zokuxhumana.
Ingoma le, ebizwa ngokuthi Imali Yesgweja, isihlanyisa labomakorokoza ngoba ikhuluma ngomsebenzi wabo lokuthi imali abayithola ngokwemba igolide isetshenziswa njani.
Ngendlela evutha ngayo ingoma le, kuzakuba ncane indawo enkundleni zokuzithokozisa ekupheleni kwalumnyaka. UFab G MshanakaGogo ukhiphe iculo lakhe leli kumaviki amabili kuYou Tube, njalo akuhlalanga isikhathi eside ukuthi ibukelwe ngabantu abanengi.
Akuvamanga ukuthi ividiyo ibukwe amahlandla afika 42 000 isanda kukhitshwa, ikakhulu kubaculi bakoBulawayo.
Iphephandaba likazulu linanzelele njalo ukuthi Imali Yesgweja, isihlatshelwa langabantwana besikolo. Labanye abantu abangakhwabithi umculo yakulezinsuku bazithola sebeyihlabela, okuveza ukuthi uFab G MshanakaGogo wenze umsebenzi omuhle.
Intatheli yephephandaba likazulu ikhulume lomculi lo ngoLwesibili lapho aveze ukuthi waqala sengathi uyadlala, engazi ukuthi uzaphuma lengoma emnandi.
“Ingoma ngayiqala njenge-freestyle ngesikhathi ngilomcimbi eMawabeni Royal Divas. Ngangifuna ukunika abantu into abangayithanda. Ngangingazi ukuthi umphakathi uzakujabulela lokhu,” kutsho uFab G MshanakaGogo.
“Angizange ngidlalise isikhathi. Ngagijimela estudiyo ngarekhoda, ngathumela idemo kuboDJ. Yingoma ekhuthazayo, iphinde ihloniphe zonke izimbamgodi elizweni. Loba uhambo lunzima kangakanani, okuqakathekileyo yikusuka ebhuqwini uye ekukhanyeni.
“Ingoma le, Imali YeSgweja, yeza ngemva kokunanzelela kwami umsebenzi wabogweja lapho okudingwa khona imali ngokuphithizela lobunzima emigodini. Ngibonga umfowethu uMusa Zulu, uNaythan ophethe iRoyal Big Bar, kunye loBra Vancy oweMbesu Mine owancedisa kakhulu ukuthi uhlelo lwethu luphumelele.”
UFab G MshanakaGogo uthe ividiyo yengoma yathwebulwa eBrooklyn Films International njalo wabambana loCliff Jeans obephethe umsebenzi wokuhlanganisa eStreet Menace Studios loCheckKid Beats oseSouth Africa.
Okwenza ukuthi lividiyo ikhange amehlo abantu yikuba khona kweqembu lengcitshi kwezokugida iRoyal Finest Dance Crew, ele-Old Magwegwe leVintage Culture Association, eyaziwa ngomswenko wezigqoko zakudala.
Njengoba esejabulisa abantu ngengoma entsha le, abalandeli bakhe bazamfisela inhlanhla kumkhosi wokubonga abaculi bakoNtuthu oweBulawayo Arts Awards, ama-BAAs.
UFab G MshanakaGogo ukumbango wesicoco se-Outstanding Male Artiste. Umkhosi wezicoco lezi uzaqhutshwa mhlaka 20 Mpalakazi.
