Online Reporter
Nkosilathi Sibanda
UHULUMENDE wakuleli uzimisele ukuthi aphathise ngazo zonke indlela ukuthi izibotshwa ezisemajele zithole ukudla okulomsoco, okwakha umzimba lokuthola amanzi ahlanzekileyo.
Ngaphansi kombuso kaMongameli uMnangagwa, uHulumende usekubeke mgceke ukuthi kasoke avumele ukuthi kube lesibotshwa esizakhala ngendlala kumbe ukuswela amanzi.
Ukuzimisela lokhu kubonakele ngesikhathi kusethulwa isibholane lokudla okubalisela amathani ayi-2,5 erayisi lengxenye yethani yempuphu, enzikini yejele leKhami Prison, koBulawayo, ngoMgqibelo odluleyo.
Ukwethulwa kwesibholane lesi, esisebenza ngamandla e-solar, kungezinye zenhlelo ezingaphansi kwePresidential Borehole Drilling Scheme, ezihlose ukuxazulula udubo lwamanzi kunye lokuthuthukisa isimo sokuhlala kwezibotshwa lezisebenzi zeZimbabwe Prisons and Correctional Services (ZPCS).
Ukwethulwa kwesibholane lesi kwenziwe nguMphathintambo wogatsha lweZezimali, lokuthuthukiswa komnotho, uSikhwicamfundo Mthuli Ncube.
UMphathintambo Ncube uthe uMongameli uMnangagwa uzimisele ukuthuthukisa impilo zabantu kuzo zonke indawo njalo lalapho okugcinwe khona izibotshwa kumele kube lenguquko lempilo engcono kuzibotshwa lomphakathi.
“Njengoba ngitshilo ukuthi uMongameli uMnangangwa wasungula iPresidential Borehole Drilling Scheme, sibone kungcono ukuthi iKhami Prison Complex layo ithole usizo. Udubo lokusilela kwamanzi koBulawayo luyaziwa.
NjengoHulumende, sesilohlelo olulembaxa ezintathu oluzaphathisa ukulungisisa lokhu.
Ukwethula izibholane lokunye okuphathisa ekuthini sithole amanzi, kumqoka. Yikho nje uMongameli uMnangagwa wasungula iPresidential Borehole Drilling Scheme lezinye inhlelo.
“Ngemva kokuxoxisana lo-Officer Commanding weZPCS koBulawayo, sikubone kufanele ukuthi sisondeze uhlelo lwePresidential Borehole Drilling Scheme lapha. Okwakhathesi sizakwethula isibholane esisodwa kodwa sizaphenduka futhi sizokwethula ezinye ezimbili,” kutsho uMphathintambo uNcube.
U-Officer Commanding weZPCS esabelweni sakoBulawayo, uCommissioner Mkhunjulelwa Ngwenya udlulise ukubonga okukhulu ngesibholane abasitholileyo.
“Ngimele umphakathi weKhami Prison ngifisa ukwethula ukubonga kwami okukhulu kunye lokuzithoba njengoba sisamukela lesisipho esimangalisayo somgodi wamanzi lokudla.
“Lesi isipho siyibufakazi bokuzimisela kukaHulumende ekuphakamiseni impilo zabantu, kungakhathalekile ukuthi bahlala ngaphi. Ukuthola amanzi ahlanzekileyo kulilungelo lomuntu wonke. Isibholane lesi sizakuba lomthelela ozaguqula impilo, inhlalakahle lokuletha isithunzi kuzibotshwa lasemphakathini ohlala kulezi indawo,” kutsho uComm Ngwenya.
Ukhulume ngokuthi kade ijele leKhami Prison lahlaselelwa ludubo lokusilela kwamanzi.
“I-Khami Prison Complex isilesikhathi eside ibhekane lenkinga yamanzi. Ngalesi isenzo sokwethulwa kwesibholane, udubo lwethu selulungisiwe.
“Sithembisa ukuthi sizagcina kuhle esikutholileyo. Phezulu kwalokho, siyabonga ngezinye izipho esiziphiweyo ezigoqela irayisi, impuphu le-Jojo Tank. Izipho lezi zizaphathisa kakhulu izibotshwa zethu lokulondoloza amanzi.”
