Online Reporter
Ethel Ncube
LABO abafisa ukuqala amabhizimusi ezokufuya sebekhuthazwe ukuthi baqale badinge ulwazi ngamabhizimusi abafisa ukungena kuwo ngaphambi kokuba baqale ukufuya.
Amazwi la akhulunywe nguMnumzana Farai Shava oyingcitshi kwezePoultry.
Uthe labo abafuna ukufuya inkukhu kumele baqale bayefunda ngokugcinwa kwazo ukuze benelise ukuthi bangathenga amatsiyane abo bawagcine kuhle angafi ngenxa yokuthi bayabe bengelalo ulwazi.
UMnu Shava ulwazi ngezokufuya inkukhu luqakathekile kakhulu ukuze ibhizimusi lihambe kuhle.
“Nxa ufuna ukufuya inkukhu zenyama kumbe ezamaqanda qala uyefunda uthole ulwazi ukuthi zigcinwa njani ungakazifuyi ukuze nxa usuzifuya ufuye ulolwazi olugcweleyo.
“Akumelanga ukweyise ukufuya ngoba kulomsebenzi futhi kulibhizimusi. Kayisikho kupha inkukhu ukudla lamanzi kuphela kukhona okudlula lapho. Kumele uyefunda ubekwazi konke okuphathelane lenkukhu ukuze wenelise ukuzifuya kuhle,” kubika uMnu Shava.
Uqhubekele phambili eveza ukuba ibhizimusi lenkukhu kumele liqakathekiswe.
“Ukufuya yibhizimusi kungakho nxa usenza ibhizimusi wenza ngemva kokudingisisa ulwazi oluthile ngaleyo bhizimusi ofuna ukungena kuyo. Ungaba lolwazi ulakho ukufuya inkukhu zakho zonke zikhule ungalahlekelwa ngitsho leyodwa ngoba okumele ukwenze okuphathelane lokufuya ukwazi.
“Kunje bekugodola abalimi abanengi bebekhala ukuthi inkukhu ziyafa kutholakale ukuba zibulawa ngumqando ezinye yimikhuhlane ebingavikelwa.
“Umuntu ongelalwazi lokuthi inkukhu kumele zikhudumale uyehluleka ukufaka imbawula esilugwini kumbe ama-infra-red red light ngoba uyabe engazi ukuqakatheka kwakho.
“Labo abafisa ukwabelwa ulwazi bangaya kumankampani athengisa amatsiyane lokudla kwenkukhu ukuze balichasisele ngendlela yokugcina inkukhu,” kuphetha uMnu Shava.
