Online Reporter
Nqobile Bhebhe
INKAMPANI yezimbamgodi, iBulawayo Mining Company, iHow Mine, esebenza ngaphansi kweNamib Minerals, isimemezele ukuthi izathutha lokuyangcwaba kwenye indawo amathuna angu-24, aphakathi kwendawo yayo ukuze kuvulwe indlela yokwandisa umsebenzi wokwemba.
Amathuna la azathuthelwa eDoyana Village, eMzingwane, eMatabeleland South.
Inkampani ithe loluhlelo luqhutshwa kulandelwa imithetho yelizwe ephathelane lokuthuthwa lokungcwatshwa kutsha kwezidumbu.
“IBulawayo Mining Company-How Mine (Namib Minerals), ngokulandela iCemeteries Act (Chapter 5:04), yazisa umphakathi ngenjongo yayo yokuthutha lokuyangcwaba kutsha amathuna angu-24 atholakala phakathi kweHow Mine Claims iwase eDoyana Village, eMzingwane, ukuze kwandiswe umsebenzi wokwemba,” kutsho umbiko.
Isaziso lesi sinika abantu abathintekileyo ithuba lokuveza imibono yabo kumbe ukuphikisa loluhlelo amathuna engakathuthwa.
“Abantu abalezikhalazo, ukuphikisa kumbe abafuna ukuveza imibono yabo mayelana lokuthuthwa lokungcwatshwa kutsha kwamathuna banxuswa ukuthi baxhumane lomphathi weHuman Resources.”
Isaziso siyingxenye yamanyathelo ajwayele ukulandelwa ngamankampani ezimbamgodi labanye nxa amathuna kumbe indawo zokungcwaba zitholakala endaweni ehlelelwe ukuthuthukiswa.
Lokhu kunika imuli ezithintekayo, izihlobo kanye lamalunga omphakathi ithuba lokuveza imibono lokukhathazeka kwawo mayelana lohlelo lokuthuthwa lokungcwatshwa kutsha kwamathuna.
Isaziso siphinda sinike abantu abalolwazi ngamathuna la ithuba lokuluveza lololwazi ngaphambi kokuthi kuqhutshwe uhlelo lokuthutha.
ICemeteries Act yiyo ebeka izimiso zomthetho ezilandelwayo ekuthuthweni lokungcwatshwa kutsha kwamathuna, njalo idinga ukuthi abathuthukisi balandele amanyathelo abekiweyo ngaphambi kokuphazamisa indawo zokungcwaba.
Inkampani ayizange iveze usuku oluzathuthwa ngalo njalo kungcwatshwe kutsha amathuna la.
