Online Reporter
Nkosilathi Sibanda
UMQEQETSHI wamaMighty Warriors uSithethelelwe “Kwinji 15” Sibanda ubika ukuba uzasebenzisa wonke amaqhinga okuthi abumbe iqembu elincintisela ukunqoba kumidlalo yeCosafa Women’s Championship.
Imidlalo le iqala mhlaka 18 Nhlolanja kusiya ku-1 Mbimbitho, eSouth Africa.
Umqeqetshi weqembu lakuleli usephakathi kohlelo lokukhetha abadlali ababona befanele ukuthi baphatheke kulumqhudelwano.
Ukukhethwa kwabadlali kuze ngesikhathi lapho ibhola labesifazane likukhefu, nanko kusalindwe ukuqala kwesizini entsha. USibanda ubize abadlali abakuligi yeZimbabwe Women’s Premier Soccer League, ebika ukuba igxile kubadlali akade elabo kumidlalo edluleyo.
Ngemva kokungadlali kuhle kuCosafa ka2024, lapho amaMighty Warriors ehluleka ukwedlula isigaba samaqoqo, uSibanda uthembisa ukwenza ngcono.
Isimo samaMighty Warriors sikhanya singcono kulandela ukudlala kwawo kuThree-Nations Cup eMalawi, linqoba 2-1 phezulu kweMalawi.
USibanda uzancediswa nguTsitsi Shiri lomqeqetshi wabonozinti u-Onai Chingawo.
“Sesiqalisile umsebenzi wokuhlola abadlali. Bakhona esesibabize enkambeni njalo khona sizakwehlisa iqembu leli, sisondelela ukuya eSouth Africa,” kutsho uSibanda.
Umqhudelwano ozabe useSouth Africa lo usetshenziswa ukudinga amaqembu azakuya ku2027 Fifa Women’s World Cup eBrazil. Kumazwe akuCosafa, kuzangena amaqembu amathathu.
Abadlali ababizwe nguKwinji 15:
Onozinti: Cynthia Shonga (Herentals Queens), Delight Matigwene (Chapungu Queens), Vanessa S. Lunga (Platinum Royals)
Imvimbi: Bridget Mutaurwa (Herentals Queens), Nobukhosi Ncube (Chapungu Queens), Egnness Tumbare (Correctional Queens), Nokukhanya Ndlovu (Platinum Royals), Fiona Kabera (Conduit Soccer Academy), Melinda Mapasure (Faithdrive Academy), Sheila Antonio (Chapungu Queens), Alice Moyo (Herentals Queens), Lucia Chisvo (Black Rhinos Queens), Christabel Katona (Black Rhinos Queens)
Abasesiswini: Daisy Kaitano (Black Rhinos Queens), Shyline Dambamuromo (Herentals Queens), Macgirl Sipini (Harare City Queens), Tasha Dube (Sheasham Queens), Bethel Kondo (Herentals Queens), Ennert Chemhere (Platinum Royals), Caroline Mangwai (Black Rhinos Queens), Tanyaradzwa Chihoro
Abagadli: Anita Ncube (Kwekwe Queens), Ethel Chinyerere (Chapungu Queens), Priviledge Mupeti (Black Rhinos Queens), Praynance Zvawanda (Herentals Queens), Thandolwenkosi Sibanda (Mpopoma Soccer Academy), Rutendo Makore (Black Rhinos Queens), Blessing Dube (Correctional Queens)
