Online Reporter
Ethel Ncube
INHLANGANISO ye-Agritex engaphansi kogatsha olubona ngezoMhlabathi, Ezokulima, Amanzi kunye lokuthuthukiswa emaphandleni isixwayise abalimi ukuthi balungise ingalane njengoba ukuvuna sekuqalisile.
UMnumzana Sibonile Dube ongu-Agritex Officer esabelweni seMatabeleland North uveze ukuba ingalane kumele ziqale ukulungiswa khathesi.
“Balimi, isikhathi sokuvuna sesiqalisile asiboneni ukuba ingalane zethu ziyalungiswa kuthi labo abangalazo baqale ukuzakha. Nxa usakha ingalane kumele ubone ukuba amagundwane awafiki lapho okulesivuno sakho khona ngoba alakho ukuba ehlise isivuno.
“Ukuvikela ukuthi amagundwane angadli kumele nxa usakha ingalane yakho ubone ukuthi uyafaka i- rat guard usebenzisa izenge ukuze amagundwane atshelele angafiki lapho okulomumbu khona,” kutsho uMnu Dube.
Uqhubekele phambili eveza ukuba wonke umlimi kumele abone ukuthi uyaphangisa ukwakha ingalane yakhe ukuze umumbu uwome kuhle.
“Akumelanga sithi singaqeda ukuhluba umumbu siwufake endlini, ulakho ukubola, kumele siwufake engalaneni uziwomele kuhle usengalaneni.
“Engalaneni uyabe ubethwa ngumoya kuthi labo abafisa ukuwusa esiphaleni selizwe, eGrain Marketing Board, uyabe uwome ngendlela eyiyo kanye edingakalayo ezenza libe lenzuzo enhle,” kutsho uMnu Dube.
Uphethe ngokukhuthaza abalimi ukuthi babone ukuba bakha ingalane zabo ngendlela eqondileyo ukuze bangalahlekelwa yisivuno sabo.
