Online Reporter
Nkosilathi Sibanda
IZIMBABWE inanza uZibuse weminyaka engamatshumi amane lanhlanu lamuhla.
Izizalwane zakuleli sezikhuthazwe ukuthi zizigqaje, zibambane zibe lothando lokukhulisa ilizwe ukuze kube lengqubekela phambili.
Lokhu kuvezwe nguMsekeli kaMphathintambo wogatsha lwe-Defence kuHulumende uBrigadier General (Rtd), uLevi Mayihlome, ophinda abengu mmeli weMzingwane ePhalamende.
“Asithandeni ilizwe okwedlula ukuthanda amanye amazwe, singabi sikhangelela phansi elethu ilizwe, siqakezela amazwe abanye abantu. Inkululeko esiyikholisayo lamuhla iyimpumela kokuzinikela kwabantu balesisizwe esikhulu, abamelana lakho kusukela 1890 kusiya 1980. Okhokho, abafowethu labodadewethu balwela inkululeko yethu ngezibindi lobuqhawe, banikela impilo zabo ukuze mina, lawe lezizukulwane zonke ezizayo sikholise umnotho lenkululeko lokuzikhethela ikusasa elihle.
“Ngakho ke, akesithathe ithuba lomzuzu owodwa sikhumbule njalo sibonge amaqhawe lamaqhawekazi asaphila ngokusinika ilifa elingaka. Ngesikhathi sibakhumbula njalo sibabonga okomzuzu owodwa ‘isibongo’ esibafaneleyo ngesokuthi thina siqakathekise ukuzinikela kwabo lelifa abasipha lona,” kutsho uMayihlome.
Uthe okuhle ngekhefu likaZibuse lonyaka yikuthi lihlangane lesikhumbuzo sePhasika.
“Ilifa leli kumbe umlandu lo, kudingeka ukuthi sikuzwisise njalo kube ligugu kithi sonke lekusasa empilweni yethu. Isicelo sami lamuhla yikuthi kasiyeni phambili ngokuzigqaja. AmaKhristu athwala isiphambano lapho iNkosi loMsindisi uJesu Khristu wabethelwa khona, ukuze kuthi ngokulaphakade sihlanzwe izono. Ngothando, ukubambana, umoya wemuli lokuzidela okwakuluphawu lwabalweli benkululeko.
“Asithatheni umlandu welizwe lethu kundawo zonke, ukuthuthukisa uzulu wonke lelizwe ngoba kungumlandu womuntu wonke lesizwe sonke. Akulamuntu opheleleyo ongatshiya ilizwe lakhe abuye azothuthukisa elethu.”
Uqhubeke wathi: “Litshoni ilanga likazibuse kuwe? Kimi ilanga lenkululeko lokuzibusa litsho ukuzidela, ukuthanda ilizwe, ukuzinikela lokwenza ingqubekela phambili yelizwe lethu.”
Uthe ufisela isigaba seMzingwane ukuthi sithokoze ngelanga likaZibuse.
“Ngokunjalo ke, Mzingwan’omuhle ngifisela wonke umuntu eZimbabwe iPhasika elihle. Njengoba lelilanga liqondana lelanga elihloniphekayo kwabokholo lwesiKhristu, ngifisela wonke amaKhristu eMzingwane, eZimbabwe lomhlaba wonke ukuthi bananze lelilanga ngokuzinikela kakutsha emoyeni weqiniso wokukholwa lothando.”
