Online Reporter
YiNtatheli kaMthunywa
KULOMFUNDI wesikolo seNtalale, eGwanda oleminyaka engu-16 yokuzalwa ogalule wafa ngeviki ephelileyo ebhukutsha esizibeni.
Umfundi lo, uNicole Ncube (16) kubikwa wasuka ngakibo esiyawatsha ngoLwesine kodwa uthe efika esizibeni wabona abanye bebhukutsha laye waseqonda khona kodwa ngokusweleka kwenhlanhla wasegalula.
Elinye ilunga lemuli uMnumzana Bophelo Sibanda uchaze ngesehlakalo sokulahlekelwa ngumntwana.
“Umntwana wasuka labanye besiyawatsha esizibeni kodwa bathe sebekhonale babona abafana ababebhukutsha basebevumelana ukuthi labo babhukutshe.
“Lo omunye ayelaye wathi yena kangeni emanzini kodwa uNaledi waqhubeka wahlubula impahla wasala lezangaphakathi wangena wabhukutsha.
“Kuhlandla lakuqala lelesibili wabhukutsha waphuma kodwa uthe esebuyela okwesithathu wabona esesenzikini yesiziba esegalula wamemeza ayehamba laye ukuthi azomsiza kodwa kazange angene emanzini wacina ebiza omunye umfana wangena emanzini wazama ukumdinga kodwa kazange ambone ngoba wayesethethwe ngamanzi,” kulandisa uMnu Sibanda.
Kubikwa abantwana bagijima bayabikela abadala abafika babophela abantu ababili intambo bangena phakathi kwamanzi bazama ukumdinga kodwa laze langena kunina ilanga bengambonanga.
Uqhubekele phambili eveza ukuba balala duzane kwesiziba belindile.
“Salala silindile sihlabela sikhuleka eceleni kwesiziba. Kuthe ekuseni sacina sifaka iwaya emanzini sadinga ngayo sezwa ukuthi isibamba kanti wayevele esethule. Ngemva kwesikhatshana sabona isidumbu sesindenda emanzini.
“Simadolonzima siyimuli ngoba umntwana lo ubetshengisa ikusasa elihle kakhulu esikolo kodwa akukho esingakwenza kumele sikwamukele njengemuli,” kutsho uMnu Sibanda.
Umfundi lo ubekwe ngeSonto kuyonale iviki.
Imizamo yokukhulumisana lesikhulumi samapholisa esabelweni seMatabeleland South yehlule ngoba kuze kwafika isikhathi sokudindwa kwephepha belokhu besithi basadinga udaba lolu.
