Online Reporter
YiNtatheli kaMthunywa
UMLOBI omkhulu uBarbara Clara Makhalisa Nkala usenxuse ukuthi kuvuselelwe isiko lokubala eZimbabwe, ikakhulukazi indimi zomdabu, azichaze njengensika ebalulekileyo yobuntu bethu.
Ekhuluma kumbukiso we-Zimbabwe International Book Fair obukhona kuviki ephelileyo ngoLwesihlanu koBulawayo, uMakhalisa uveze indima abazali okumele bayidlale ukuhlakulela uthando lokubala ebantwaneni besebancane.
“Kuyadingeka ukuthi sivuselele ngokuphangisa isiko lokubala, ikakhulukazi indimi zomdabu njengoba lokho kuyingxenye ebalulekile yobuntu bethu,” kutsho uMakhalisa.
Unxuse imideni ukuba yenze izingwalo ezibhalwe ngolimi lomdabu zibe yizo ebibalwa kuqala ngekhaya.
“Abazali kumele bakhuthaze abantwana ukuthi babale besesebancane. Isiko lokubala liqala ngekhaya,” kutsho uMakhalisa.
UMakhalisa, owake waba lilunga lebhodi yeZimbabwe International Book Fair, uchaze ukuthi balutshwana abathakazelela ukubala.
“Ngake ngaba lilunga lebhodi yeZimbabwe International Book Fair njalo ngikhumbula amahlandla amathathu sikhuthaza ukubalwa kwezingwalo, kwakunzima ukuthi abantu bakwamukele.
“Ngesikhathi sekhefu leKhisimusi abazali baqakathekisa ukuthenga impahla zokudlalisa ama-toy kulokuba bathenge amabhuku okubala,” kwengeza umakhalisa.
Ngenhloso yokukhuthaza ukubalwa kwezingwalo kanye lokuziqhenya ngomdabuko wakho, uMakhalisa usesungule imncintiswano ehlose ukuba kunanzelelwe indima edlalwa zindimi zomdabu.
UMakhalisa usebhale ingwalo ezibalisa ezithi; Qilindini, Impilo Yinkinga, lelithi UJojojo kaMantombi. Kunye lelinconywa ngabanengi elithi Umendo, eladindwa yiMambo Press.
Ugwalo lwakhe olutsha ngoluthi Gqubula, aluloba ngenyanga ezintathu.
