Online Reporter
Yintatheli kaMthunywa
ABESIFAZANE ababili, okuthiwa baziphendule baba njengo-Count Dracula wezinsuku zalamuhla, bavele emthethwandaba ngemva kokuhlasela abanye abesifazane ngokubaluma ebusweni, eminweni lasezindololwaneni.
UNancy Murinye (30) loRosylin Luwizhi (25) kuthiwa baguqule iGlamis Arena yaba yindawo egcwele igazi ngesikhathi behlasela ababesemcimbini, baphinde badonsa ama-weave abizayo emakhanda abo.
Kuthiwa bahlasele abanye abesifazane ngesikhathi umcimbi odume kakhulu oweDoek & Slay ususiyaphela eGlamis Arena ngeSonto.
Lokhu kuhlasela okwethusayo, lapho abasolwa okubikwa badonse khona ama-wig besebenzisa amandla futhi behlasela abanye omama, akujayelekanga.
UNancy loRosylin bavele izolo phambi kukamantshi weHarare uRuth Moyo, bebhekene lamacala amane okutshaya lokulimaza abantu.
Bobabili banikwe ibheyili engange-US$150 ngamunye njalo bazaphindela emthethwandaba mhlaka-3 Mpandula.
Umtshutshisi uTakudzwa Jambabwu ubikele inkantolo ukuthi ngeSonto, ngezikhathi zabo-8 ebusuku, ngesikhathi umcimbi ususiya phela, uFlorence Svovera wayesemcimbini weDoek & Slay ngesikhathi esondelwa ngabasolwa esiya ezindlini zangasese.
Inkantolo ibikelwe ukuthi uRosylin kuthiwa wadonsa i-wig kaFlorence ngamandla wase mtshaya wawela phansi.
Ngesikhathi uFlorence ezama ukumelana labo, uRosylin kuthiwa wamluma ebusweni lasemunweni omkhulu ophakathi wesandla sokudla, ngesikhathi uNancy kuthiwa wamluma kundololwane yesandla sokudla. Lokhu kwenza uFlorence wacina esededela i-wig.
Ngecala lesibili, inkantolo yatshelwa ukuthi ngesikhathi esifanayo, uSharmaine Tumbawi laye wayesemcimbini ngesikhathi laba abasolwa ababili, kanye lomunye ababambisene laye osabalekayo, kuthiwa bambamba.
URosylin kuthiwa waphosela uTumbawi phansi wasemluma emakhaleni.
UNancy lomunye umuntu ongaziwayo kuthiwa babaleka, ngesikhathi uRosylin esala lapho, elokhu ebambe uTumbawi.
USharmaine walimala kakhulu, wathola inxeba elijulileyo emakhaleni.
Kusehlakalo sesithathu, inkantolo yatshelwa ukuthi ngezikhathi zabo-9 ebusuku, uSandra Marufu wayesemcimbini ofanayo ngesikhathi abasolwa kuthiwa bamsukela bambamba.
URosylin kuthiwa wazama ukukhumula i-weave kaSandra, okwenza uSandra wayibamba ukuze angayithathi.
Inkantolo yatshelwa ukuthi uRosylin waluma uSandra endlebeni yangakwesokhohlo, walimala.
Kucala lokucina, uChido Milanzi kuthiwa wangena kulingxabano labasolwa ngesikhathi ezama ukubangqanda ngesikhathi sokungazwanani okwakuthinta udadewabo.
URosylin kuthiwa waluma uChido esihlathini sokhohlo lasendlebeni, okwaholela ekutheni indlebe yakhe yangakwesokhohlo ilimale.
Indaba le yabikwa emapholiseni, okwacina sekubangela ukuthi abasolwa babotshwe.
