Online Reporter
Sikhumbuzo Moyo
AMAPHOLISA koBulawayo aseqalise ukudinga indoda eleminyaka engu-27 yokuzalwa esolwa ngokuqila abanikazi bezimota abangu-16, ibathathela izimota ezibiza imali ephezu kwe US$161 500.
UKieth Nyasha Sibanda oweMahatshula North kubikwa waqhuba ubugebenga lobu phakathi kukaNhlangula 2025 loNtulikazi 2026, lapho ayesondelela kubanikazi bezimota esithi ufuna ukuqhatsha izimota zabo okwesikhathi esifitshane.
Ngokutsho kwesikhulumi sogatsha lweCriminal Investigations Department (CID) elizweni, uDetective Inspector Rachel Muteweri, uSibanda wayeqala ngokwenza abanikazi bezimota bamthembe, ehlose ukuthi bayengeze isikhathi sokusebenzisa izimota lezo.
USibanda kuthiwa wayesethengisa izimota kumbe azisebenzise njengesibambiso ukuze athole imali ebolekiweyo ebantwini abatshiyeneyo.
“Ngenxa yezenzo zakhe, abantu balahlekelwa yizimota ezingu-16, zonke zibiza i-US$161 500. Izimota ezingu-13 sezitholakele,” kutsho uDet Insp Muteweri.
Amapholisa acele abantu abangaba lolwazi olunganceda ekutholakaleni kukaSibanda ukuthi balubikele emapholiseni aseduzane.
Amapholisa aphinde akhuthaza abanikazi bezimota ukuthi baqaphele nxa benika abanye izimota zabo ukuthi bazisebenzise kumbe baziqatshe, njalo baqinisekise ukuthi izivumelwano zokuqatsha zilandelwa ngendlela efaneleyo.
