admin
YiNtatheli kaMthunywa
ZIKHATHAZEKILE izakhamizi zeMahetshi eKezi ngenxa yokusilela kwamanzi kuleyondawo osekubangela ukuthi imizi edlula i-600 inathe esibholaneni esisodwa osokusenza njalo ukuthi inkomo zicube zife ngenxa yokuswela amanzi.
Kubikwa izakhamizi ezilezifuyo sezihlala njalonje zixabana lezingelazo kubangwa ukuthi ezilezifuyo zisuka zizinathise okwenza ezinye izakhamizi zicine ziswela amanzi esibholaneni.
Intatheli ixhumane lokhansila wakule indawo uMnumzana Henry Nzuma Ncube oveze ukukhathazeka kakhulu ngodubo lwamanzi esigabeni sabo.
“Ukusilela kwamanzi sokwenze satshabalelwa yimisebenzi yokulima kuma-irrigation ngoba akusela manzi okuthelezela izilimo njalo sekutshile ezingadini sokungokunye ngoba lawo esilawo malutshwana,” kutsho uKhansila uNcube.
Uqhubeke eveza ukuthi uhlupho lwamanzi lulakho ukubaqedela izifuyo.
“Inkomo, imbuzi labobabhemi kuyacina kusifa ngoba amanzi esegcinelwa ukuthi abantu banathe. Indlala yamanzi ibuhlungu ngoba akuphileki, konke okwenziwayo kufuna amanzi. Imifula leziziba sokwatsha, akusela ngitsho awokukhipha inkomo umhawu,” kubika uKhansila Ncube.
Ekhuluma lentatheli uMnumzana Ncube uveze ukuthi imihlambi abasele layo abakwazi ukuthi bazayithini.
“Izifuyo lezi ezilutshwana asazi ukuthi zizathiwani ngoba yizo njalo ezisizayo ekubhadaleleni abantwana imali zesikolo, siswele ukuthi siyezigcinisa ngaphi okulamanzi khona. Sicela ukuncediswa sithole amanzi ezifuyo lokuthi abantu banathe,” kubika uNcube.
Intatheli ixhumane lesinye isakhamuzi uMnumzana Bekezela Ndlovu oveze ukuthi amanzi ayasilela ngoba izibholane azisela manzi.
“Sihlalele evalweni ukuthi lalesi esisodwa esilaso singaphela amanzi asikwazi ukuthi sizaqonda ngaphi lezifuyo zethu. Amanzi ayafuneka, izingadi asisalimi ikanti bezisincedisa ekutholeni isitshebo khathesi asisenelisi,” kuphetha uMnu Ndlovu.
Online Reporter