adminZVIKORO zveB and P Study Centre zviri kuenderera mberi mukusimudzira fundo munyika zvichitevera kuvandudzwa kuri kuitwa zvimwe zvacho kuti zvive mabhodhingi kunzvimbo dzakaita sekwaSeke.
Muhurukuro neKwayedza, Reverend Bigboy Gawa, vanova muridzi wezvikoro izvi, vanoti basa rekuvandudza chimwe chikoro chavo chepuraimari chekwaSeke rakatotanga uye riri kufambira mberi zvakanaka. “Izvozvi tiri kuvandudza puraimari yekwaSeke kuti ive bhodhingi uko kwakatopera kuvakwa dzimba dzinoti dzeECD, yacaretaker, matron, yaboarding master uyewo hwaro hwedzimba dzekurara dzevana hwakatotanga kuvakwa. Munguva pfupi iri kutevera dzimba dzekudzidzira dzinenge dzatangawo kuvakwa. Patinosvika kupera kwegore rino, chikoro ichi chinenge chapera kuvandudzwa,” vanodaro Rev Gawa.
Vanoti vane imwe nzvimbo yavakapihwa kumaruwa ekwaSeke padyo nekuDema uko vanoda kuvakawo zvimwe zvikoro zvepuraimari nesekondari uye vanotarisira kuti kuzovawo nebhodhingi.
“Pamusoro pezvo, kuNyamhunga, kuKariba tiri kuvaka chikoro chesekondari nechepuraimari izvo tine hurongwa hwekuzozviita mabhodhingi zvakare,” vanodaro.
Rev Gawa vanoti munyika muno zvikoro zvepuraimari zvinove mabhodhingi zvishoma zvikuru uye ichi ndicho chikonzero chiri kuita kuti vave nezvikoro zverudzi urwu.
Zvikoro zveB and P Study Centre zvakavambwa mugore ra2008 uye zvinowanikwa munzvimbo dzakaita sekwaSeke nekuChitungwiza.
“Zvikoro zvedu zvose zvine vashandi 105, vadzidzisi vachikwana 70 pamwe chete. Vana vepuraimari vanosvika 905 avawo vesekondari vari 401. Bhodhingi yedu yepuraimari ichange ichitangira paGrade 3 kusvika 7,” vanodaro. Vanoti vanofara zvikuru nekubudirira kuri kuita vadzidzi vepazvikoro zvavo mubvunzo dzeGrade 7, O- neA-Level.
“Gore rakapera paseri pabvunzo dzedu dzeGrade 7 vana vapakasa nechikamu che98,8% uyewo gore rapera tikaita 100%. Kusekondari – uko vadzidzi vanonyora bvunzo dzeCambridge neZimsec dzeForm 4 neForm 6 – gore rapera O-Level vakapasa nechikamu che71% paA-Level ndokupasa ne75%,” vanodaro VaGawa.
Vanoti chishuwo chavo kuti vana vepazvikoro zvavo varambe vachibudirira mubvunzo dzavo.
VaGawa vanoti vane mabhazi anotakura vana kuvaendesa nekuvadzosa kuchikoro.
Online Reporter