admin
Nyasha Bvudzijena
MURUME samusha wekuDomboshava uyo ane barika revakadzi anoti ari kuoneswa ndondo nemudzimai wake mukuru uyo ane shanje dzinobvira moto zvekuti pose paanoda kuenda kumba kwanyachide, anoshevedzera kuvavakidzani achiti, “Batai baba avo” izvo zvava kumudzikisira chimiro.
Noise Chikoto akataura mashoko aya mudare reHarare Civil Court apo akamhan’arira mudzimai wake Rumbidzai Katiyo achiti anomushungurudza.
Mutongi Noah Gwatidzo akapa Chikoto gwaro rinomuchengetedza.
“Mambo, ndashungurudzika zvikuru nekuda kwaamai ava kunyangwe tiine musha wedu watakavaka kwaMandaza.Ndava kurohwa nekudzingwa pamba, zvose izvi zvichibvira panyaya yekuti ndava nemumwe mukadzi.
“Ndikangoti ndava kunoona mwana, anobuda panze otanga kushevedzera kuti batai baba avo sekunge ndiri kutiza pamba,” anodaro Chikoto.
Anoti anoda kuti dare rimubatsire kuti Katiyo asamurambidze kuenda kumudzimai wake wechipiri uyo waaine mwana naye.
Katiyo anoti Chikoto ari kuudza dare manyepo.
“Baba ava handivarove asi kuti nyaya iri kunetsa ndeyekuti vava nemumwe mukadzi saka vava kupota vachitengesa midziyo yatakatenga tese vachipa mudzimai uyu mari. Ndikada kumubvunza anonditi baba havabvunzwe saka ndinozopedzera shungu mukupopota,” anodaro Katiyo.
Anoti haadi kuti Chikoto aite barika kunyangwe zvazvo vakaroorana pachivanhu uye vasina muchato.
Online Reporter