admin
Cornelius Luphahla
AZILAMATHE izakhamizi zesigabeni seSihlengeni empumalanga yedolobho lakoBulawayo ngemva kokuba esinye isakhamuzi sakule indawo sikhutshelwe inkalakatha yegundwane elilobuhlalu okubikwa beliluma abantu.
Isiga lesi senzakale ngoLwesibili kuyonale iviki lapho uNkosikazi Madade Lunga (80) okhitshelwe khona igundwane elesabekayo ligqize ubuhlalu laphelela njalo okubikwa beselimqedile ngokumluma langokumchamela, uMthunywa uyakuveza lokhu lamhlanje.
UMthunywa uphuthume wayafika kule indawo wakhulumisana loMnumzana Mbulisi Tshuma ochaze ukuthi igundwane leli ulibone ngawakhe amehlo.
“Mina bengikhona kukhitshwa igundwane leli ngakho abaphurofethi balixotshanise bafuza indlu yonke baze balibambela ngaphansi kombheda kaMaLunga. Igundwane leli beligqize imihlobo yonke yobuhlalu ungeke utsho lokuthi ligundwane,” kutsho uMnu Tshuma.
Uqhubekele phambili njalo wachaza ukuthi ngemva kokukhitshwa kwegundwane leli uMaLunga wabonga kakhulu.
“Kwathi ngemva kokuba abaphurofethi laba balikhiphe leligundwane uMaLunga wabonga kakhulu wathi bamncedile kade esetshile ngokuchenyelwa ligundwane. Wachaza njalo ukuthi igundwane leli lalithi lingamchemela alunywe umzimba wonke yikho ehlala esenwaya.
“Isimanga yikuthi wathi igundwane leli ngelakhe angazi ukuthi kungani laselimchemela njalo limluma kumbe wayengasalenzeli kuhle,” kulandisa uMnu Tshuma.
UNkosazana Simanga Moyo omunye wezakhamizi zakule indawo uchaze ukuthi igundwane leli lake lababalekisa emfeni libaluma kakhulu.
“Sathi sisemfeni kamalukazana kaNkkz Lunga amagundwane asihlasela asiluma kakhulu saze saphuma sayahlala phandle satshiya isidumbu sodwa. Isimanga yikuthi amagundwane akhona ayebonakala esebaleka ngemva kokukuluma njalo wawungeke ulibulale lelogundwane.
“Kwathi kusisa sathola amagundwane la esedle isidumbu asiqeda umlomo lamakhala abuya njalo asiluma inyawo lamazwane,” kuchaza uNkszn Moyo.
Ebuzwa ngale indaba uNkosikazi Madade Lunga uvumile ukuthi igundwane leli lakhutshwa emzini wakhe njalo laselimhluphile.
“Igundwane leli kuliqiniso sibili ukuthi lakhutshwa emzini wami njalo laselingihluphile ngokungiluma langokungichemela. Ngikhuluma nje kangisakhangeleki emzimbeni ngoba ngihlala ngisenwaya lapho elingichamela khona. Ngemva kokukhitshwa kwaleligundwane sengisizwa ngcono ngoba lekhanda ebelingiluma khona sokunganeno,” kutsho uNkkz Lunga.
Uqhubekele phambili njalo walandisa ukuthi igundwane leli lasala kudala njalo abalibambileyo balamandla amakhulu.
“Igundwane leli lasala kudala lize libalekele omunye umphurofethi esebambe elinye ngakho kutsho ukuthi lahle lazonda laqala ukungiluma. Isimanga yikuthi igundwane leli kayisilo lami angazi ukuthi lavela ngaphi lize lingiqede kangaka.
“Abafana laba abalibambileyo balamandla sibili. Ngeqiniso bazabongwa nguMdali wezulu lomhlaba ngoba bangincedile besengitshile,” kuphetha uNkkz Lunga.
Online Reporter