admin
Thokozile Mbedzi
KULEQEMBU labafana ebeselizibiza ngokuthi yiCovid-19 Gangstars leHope Fountain elibanjwe xhaka litshontshe imbuzi eziyisificaminwe mibili.
Abafana laba okutholakale ukuthi ngu-Innocent, Alpha loMenelisi lanxa kungasatholakalanga izibongo zabo labanye ababalekayo kubikwa besebehluphile ngokungena ezibayeni zezakhamizi betshontsha imbuzi.
Imbuzi eziyisitshiyaminwe mibili ababanjwe bezifake esibayeni kubikwa babezitshontshele uMnumzana Vusumuzi Ncube.
UMthunywa uzwe ukuthi omunye wabafana laba, uAlpha ubezenza umphurofethi kanti ucatsha ngomunwe lisela.
Ekhuluma lentatheli kaMthunywa uMnu Ncube uveze ukuthi ulahlekelwe yizifuyo zakhe ezinengi ekhumbula ukuthi ngamakhanka kanti ngabantu abamtshontshelayo.
“Imbuzi zami beziphongukunyamalala ngambili ngantathu loba ezine mina ngizitshela ukuthi ngamakhaka lezinja ezike zahlupha kakhulu kithi lapha.
“Kuthe baze batshontshe lezi ezingu-8 batshiya isibaya sivuliwe sahle salandela unyawo ngoba sokukhanya ukuthi ngabantu, akusimakhanka.
“Sengilandele unyawo ngathola imbuzi ezimbili zibotshelwe kodwa ezinye zazingekho. Ngaleso sikhathi ngathi ngimbamba wangikhama kodwa ngamkhulela ngamandla waze wangekela.
“Ngalesosikhathi wahle wachaza ukuthi bebetshontsha bebanengi imbuzi lezo, wasesiyasitshengisa abanye atshontsha labo lanxa abanye babaleka, senelisa ukuthi sibambe abathathu,” uMnu Ncube.
“Ngicela ukuthi amapholisa asiphathise abophe izephulamthetho lezi ngoba sezisiqedele izifuyo zethu.
Isikhulumi samapholisa esabelweni seMatabeleland South uInspector Philisani Ndebele ebuzwa ngodaba lolu uthe uzaluphenyisisa.
“Udaba lwembuzi ezitshontshwayo ngizaludingisisa sizwe ukuthi amasela la asebanjiwe yini,” kuphetha uInsp Ndebele.
Online Reporter