admin
Johas Moyo
KULAMAJAHA amabili akoBulawayo abhuqane kwaba luthuli eGodini ngempelaviki kubangwa ibhola okwenze omunye wacina etshaywa ngembodlela ekhanda.
UMthunywa uzwe ukuthi uBongani Nxumalo ubezijabulela ngokunqoba okwenziwe liqembu leBosso nanko phela ubehamba ehlabela engazi ukuthi usecunule uTapiwa Sibanda ngoba elakhe iqembu linqotshiwe.
Kubikwa uSibanda wakhuluma kubi engazi ukuthi wayeseyinyathele emsileni ngoba bahle badumelana loNxumalo bacina sebelumana ngamazinyo.
UMthunywa ufike ngesikhathi laba ababili besilwa njalo uNxumalo ubesebomvu gebhu uSibanda esebalekile ngemva kokumjikijela ngembodlela wahle wacela ezinyaweni.
UMthunywa uxoxe loBekithemba Sibindi yena oveze ukuthi ababili laba bebebanga impumela yenguqu baze balimazane.
“USibanda nguye ohlokoze uNxumalo andubana amwankale ngempama waphinda wamtshaya ngembodlela andubana abaleke ngoba esehluliwe,” kutsho uMnu Sibindi.
Esinye isihambi ebesiseGodini siveze ukuthi besikhona impi le iqalisa.
“USibanda engabe enze lokhu ngoba engazenzi ubesephandlwe ngamabele kungakho akumelanga bamsole ngoba mhlawumbe wayethunywa butshwala.
Intatheli kayisenelisanga ukuxhumana loSibanda ngoba uhle wabaleka eqeda ukujikijela uNxumalo ngembodlela.
Ekhuluma loMthunywa uMnumzana Nxumalo uchaze ukuthi ukulwa kwakhe kwenziwe yikuthi ubezivikela emuntwini omdelelayo ngoba behlulwe njalo uyindoda eligwala ngoba umjumile.
“Mina ngilokhu ngibuhlungu ngokudelelwa okunje ngumuntu ongivukela ubhova ngizijabulele, bengingalwi lamuntu kodwa bengithabela ukunqoba kweqembu lami eselilesikathi lisehlulwa.
“Thina ngesikhathi sisehlulwa kasilwanga labantu ngoba sikwazi ukuthi kungumdlalo kodwa okwalindoda kuyehlula,” kutsho uMnu Nxumalo. Indaba le icine isiyabikwa emapholiseni.
Online Reporter