admin
Yintatheli kaMthunywa
UKUNQOBA kweHighlanders phezu kwesitha sakudala iDynamos sekukhukhumeze ukuzethemba kumaqhuzu wethimu le uNdumiso Gumede obika ukuthi iqembu lakhe lizayiphakamisa inkezo yeCastle.
“Abadala sebekhulumile. Injabulo isifikile egumeni lamakhosi. Kanti impi le ibizaphetha ngani,” kutsho uGumede.
“Kusina kudedelwana kunguqu. Lathi sasibusa eminyakeni ethile, sibutha zonke inkezo. Layo iDynamos yabuya yabusa futhi. Khathesi yisikhathi sethu. Uyezwa ukuthi kumnandi njani?
“Kanti bekuzaphela nini ukuhlala sikhala ngokuthi iDynamos iyasinqoba? Sekwanele njalo akumelanga sihlale sikhumbula ngemidlalo yakudala. Imidlalo yalisizini yehlukene kakhulu kulamasizini adluleyo. Siqala kutsha.”
IHighlanders ikhwele phezulu kweDeMbare ngokuhlohla amabili emambuleni. Kuhlohle uPrince Dube loBruce Kangwa. Umdlalo lo uqede isiqalekiso sokwehluleka kweBosso ukudla iDynamos okweminyaka eyisitshiya galolunye kuligi yenguqu ephakemeyo.
UGumede owayengomunye walabo ababukela umdlalo lo enkundleni yeRufaro uthe lonyaka iqembu leHighlanders lizakuba yintshantshu yenkezo yeligi yeCastle loba sekutheni ngoba akula okunye abakukhangeleyo ngaphandle kwalokhu.
Umaqhuzu weTshilamoya lo kakufihli ukuthi sesiphelile isikhathi sokuthi iBosso idelelwe ngamanye amathimu.
“IHighlanders isileminyaka engamatshumi ayisitshiyagalolunye idlala inguqu. Umnyaka lo uzaletha injabulo esingakaze siyibone.
“Nxa singehluleka ukuthatha inkezo, ngubani ozayithatha. Sizimisele ukuthi sithakazelele i90 years yethu ngokuba zintshantshu.”
Ngokuthwala iligi ngo2006, iHighlanders ayizange inqobe isondelele ukubamba inkezo le.
“Sacina ukubamba inkezo ngo2006, lapho esacina khona ukudla iDynamos. Khathesi ngu2016, sesiyinqobile iDynamos kuhlandla lakuqala, okuyikhona okwenza ngicabangele ukuthi sizakwenza izimanga ezacina ukubonakala ngo2006,” nguGumede lo.
Amalunga abasekeli bethimu lawo andiza phezulu kulezinsuku ngokunqoba kweqembu.
UMthunywa ungene esitaladeni sakoBulawayo ebuzisisa ngomdlalo odluleyo. Abasekeli babika ukuthi abakaze bathole injabulo enjengale.
UMthandazo Mabhena laye obefikile eHarare uthe ukunqoba kweBosso akube yisikhumbuzo kwamanye amathimu ukuthi lonyaka kuzafiwa.
“Abantu abahlale besazi ukuthi imbali ayinqobi umdlalo wenguqu kodwa kunqoba ukuzimisela kumdlalo elibhekane lawo. Lonyaka iBosso izawaquthula wonke amaqembu.”
Abanye abasekeli bakaMantengwane bathe ukujabuliswa ngumdlalo owodwa akusizi ngoba iligi inqotshwa yithimu enqobe zonke encintisana lazo.
UNkosikhona Ncube ohlala eGwabalanda uthe : “Kade sakhala isililo sokuthi abadlali bethu baphiwe ithuba, nanko-ke sekwenzakele. Ongafuniyo kayekele.”
“Iqiniso yikuthi loba ithimu idlale kuhle. Kuyadingeka ukuthi umqeqetshi aqinise abadlali bakhe besiswini lokuthi akhuthaze imvimbi ukuba zikhulumisane lonozinti emdlalweni.”
Kusenjalo, uErol ‘‘Mkabayi’’ Akbay umqeqetshi weBosso uthe kafuni ukugcwalwa zinhloni zokunqotshwa kumkhankaso wakhe wokuqala ekuleliqembu.
Ngokuqhatshwa kwakhe kuHighlanders, uAkbay kukhanya ukubona kungumlandu wakhe ukuthi akhuze ithimu ukuze inqobe.
“Ukutshaya iDynamos kubeyisibusiso.Amanye amathimu azaqala ukuyihlonipha iHighlanders ngoba izakuba yithimu yokubukela lokusekela kumidlalo elandelayo, ” nguAkbay lo ekhuluma loMthunywa.
UAkbay uqhubeke wathi imuli yeHighlanders ayinanzelele ukuthi ukunqoba ithimu eyodwa akutsho ukuba umkhankaso wenkezo yeCastle usuphelile.
“Singakhangeli umdlalo owodwa kuphela. Ukunqoba phezulu kweDynamos loba yiphi ithimu ayisikugqiba umncintiswano. Manengi amaqembu kuligi esidlala lawo, alakho ukuthi asincintshe ithuba lokuba zintshantshu.”
Kungalane yomncintiswano iBosso ihlezi kunombolo yesibili ngemiklomelo engu-17 njalo ihamba phambili ngokuhlohla amabhola. IBosso isiboboze umambule ka-15 kumidlalo eyisitshiya galombili.
Online Reporter