admin
Cornelius Luphahla
KULENDODA ehlala esiqintini seNtabazinduna ebanjwe xhaka ngabaphurofethi igcine inkalakatha yohalabezi lwenhlathu okubikwa ibe ihlala ku-wardrobe iphila ngokudla ubulongwe benkomo.
Inyoka le yayitshiyelwa nguyise njalo ibisebenza ukuthatha amathole ezinye izakhamizi iwaletha kule indoda kanye lokulala labesifazana ebusuku.
Isiga lesi senzakale ngoLwesibili kuyonale iviki lapho uMnumzana Enock Mnkandla okhitshelwe khona inhlathu le ngabaphurofethi ku-wardrobe okubikwa ibisebenza ukumunya amathole ezinye izakhamizi igazi afe ayevukela esibayeni sale indoda ibuye njalo ithathe lamabele ezinye izakhamizi zalapha, uMthunywa uyakuveza lokhu.
Kuzwakale ukuthi inyoka le bekuthi nxa kusebusuku ihambe ezibayeni zezakhamizi zalapha iyekudla ubulongwe benkomo ibuye njalo imunye igazi ematholeni asasemancane avuke efile ayevukela esibayeni sikaMnkandla kuthi ntambama ilale labesifazana.
UMthunywa ukhulumisane lesakhamuzi sakule indawo uMnumzana Carlos Nombembe wachaza ukuthi yena wayekhona mhla kukhitshwa inyoka le njalo kalankani ngayo.
“Mina ngangikhona mhla abaphurofethi bekhipha inyoka kaMnkandla njalo kangilamathe ngenyoka engayibonayo.
Abaphurofethi bathi bembuza ngenyoka le wavuma ukuthi ngeyakhe wathi wayitshiyelwa nguyise ethi ngeyokumnothisa ukuze abe lenkomo ezinengi.
Isimanga yikuthi noma nje wayezithatha inkomo zethu kodwa akukhanyi lokuthi wayezisa ngaphi asazi kumbe wayezidla lenyoka yakhe,” kutsho uMnu Nombembe.
UNkosazana Patricia Moyo ubikele intatheli ukuthi ukubona kuliqiniso ukuthi uMnu Mnkandla wayebabulalela amathole abo ngenyoka yakhe ngoba awakhe ahlala esifa.
“Ngokubona kwami kuliqiniso sibili ukuthi uMnkandla ubesebenzisa inyoka yakhe ukubulala amathole ethu awase esibayeni sakhe.
Ngitsho ngoba khathesi ngikhuluma nje ngilamathole amabili esibayeni sami kuthi amahlanu afa njalo vele amathole ami ahlala esifa kokuphela.
Njengoba sebeyikhiphile inyoka le ngilethemba lokuthi sengizakuba lamathole ngidle uchago njengabanye,” kutsho uNkszn Moyo.
Ebuzwa ngale indaba uMnumzana Enock Mnkandla uvumile ukuthi kwaphuma inyoka emzini wakhe kodwa kayazi ukuthi yafakwa ngubani.
“Kuliqiniso ukuthi kwaphuma inyoka ku-wardrobe yami abaphurofethi bathi yatshiywa ngubaba kodwa mina kangiyazi.
Ukuthi kwahamba njani kangikwazi ngoba kwasokumnyama kimi kodwa engikwaziyo yikuthi ngatshiyelwa ngubaba amalembu amadlozi agidwa ebusuku ngawagcina ku-wardrobe njalo kangikaze ngiwavule lokhe ngawatshiyelwayo,” kuphetha uMnu Mnkandla.
Online Reporter