admin
YiNtatheli kaMthunywa
UHULUMENDE uzimisele ukuthuthukisa impilo zomphakathi wabaThwa abaseTsholotsho, ngokwakha izikolo lokuvula amathuba okuthi labo abafuna ukuba ngamabutho bangene emsebenzini.
Lokhu kuvezwe nguMphathintambo wezokukhutshwa kwembiko lokusakaza kuHulumende uMonica Mutsvangwa ngemva komhlangano weKhabinethi ngoLwesibili.
UMphathintambo uMutsvangwa uthe kulandela umbiko ovele kuMphathintambo we-Local Government and Public Works uJuly Moyo, uHulumende useqalise inhlelo zokuthuthukiswa kwabaThwa njengokuvumelana kweKhabhinethi ngoNtulikazi lonyaka.
Lokhu kulandele umhlangano wokuxoxisana owabakhona lomphakathi esigabeni seTsholotsho.
“Wonke amaphurojekithi asehlelweni, abanjwe zingatsha ezithile kuHulumende ngenjongo yokwenza ngcono impilo zomphakathi weTjawo.
Inhlelo lezi zigoqela ukukhuliswa kwembuzi, ukulima izivande kanye lokuqoqwa kwamadamu.
“Ugatsha lwezemfundo ye-Primary le-Secondary seluhlangane leTsholotsho Rural District Council ukuthola indawo ezingakhelwa kuzo izikolo zamabanga aphansi lezamabanga aphezulu,” nguMphathintambo uMutsvangwa lo.
Uthe ugatsha lwezemali kuHulumende luzasekela ngemali ukwakhiwa kwezikolo ezimbili zamabanga aphansi lezamabanga aphezulu.
UHulumende ubike ukuba abaThwa kumele baphiwe ithuba lokungena kuZimbabwe Republic Police (ZRP) kanye lakuZimbabwe Defence Forces (ZDF).
“Loba ibutho seliqedile ukuqhatsha abantu kulumnyaka, lizimisele ukuthi liqhatshe emphakathini yabaThwa ngomnyaka ozayo.
“I-Zimbabwe Prisons and Correctional Services (ZPCS) isanda kuvala uhlelo lwayo lokuqhatsha kodwa isihlele ukuthi igcina i-quota ezavulelwa abaThwa baseTjawo ukuze bangene.”
Online Reporter