admin
Silo Mehleli Dube
UTHOLAKELE wathi esiyakwenda, kazange ake athole ithuba lokulaywa nguyisekazi, ngoba yena wathi ukuselwa elejaha lakhe wavela wathi kasabuyeli ngakibo sokumele kuthunywe umuntu ayetshela abangakibo ukuthi “dingelani ngapha”.
Ijaha lakhe lalisebenza kwenye inkampani edolobheni ehola ngengwane, behlala bebobabili, kungela oqondisa omunye ngesiko lemikhuba yonke into babeyithatha lula.
UTholakele wayegqoka santando khona nxa kutshisa kwasekusele nje ukuthi ahambe nqunu belo lojaha wakhe wayengelandaba ukuthi uvunuleni ingqe evale ingasese.
Basuka ngelinye ilanga besiya ekhaya sekumele ayebona abazali bejaha, banombela ibhasi ebhekisa amabombo kibo kwajaha. Wayevunule ibhulugwe lesidoda elibamba mpa wawungathi mhlawumbe lavela lanamathiselwa mhla ezalwa.
Bafika ekhaya sekunqunda amehlo inengi lezihlobo labangane bazombona kusasa umalukazana ovela edolobheni.
Lakanye bavuka bebuya ekuseni abomdeni labomakhelwane bezokhunga, abanye ngembuzi lange nkukhu. Kwavuka kutshisa, phela wawungathi mhlawumbe ilanga lehlisiwe kancane, lamanzi esibholane engawejwayelanga esekhumbula aqandayo awedolobheni.
Wavuka umalukazana wagqoka isigcebhezana, phezulu egqoke isikipa esitshiya inkaba phandle ngoba laso sisifitshane ethi ufuna singenise umoya ngoba kutshisa, bathi besabambe owangaphansi ngokumangala ukuthi kambe nhloboni kamalukazana omutsha ovunula kanje ekobabazala.
Kwathi sekumele agezise izitsha wathi uyakhothama ngoba konke ayekugqokile kukufitshane wezwakala uMagutshwa uyisekazi wejaha lakhe ethi waze wasiphathela olulofezela ulama-tattoo eqolo kutsho vele yisigebengu.
Izingqe kwakuyizikhwama zomdududu iqolo kungelikanyolovu, ethi eyabuzela egumeni epheka etshikiza njengetshoba lenkonkoni edinga inkonyane yayo ingasazi lapho eyilalise khona.
Wezwakala umalumakhe ethi mzukulu lowo malukazana ngowakho khonale edolobheni ngapha ungezi laye ngoba uzakhweza oyihlo iBP.
Ayixabene.
Umlobi ungamthinta ku: 0714355641.
Online Reporter