Online Reporter
Fungai Muderere
ABAKHOKHELI beChicken Inn babike ukuba bayakuthokozela ukubizwa kwabadlali babo ukuthi bayezama inhlanhla kumaWarriors, bechaza ukuthi lokhu kutshengisa ukuthi ithalenta laleliqembu liyabonakala.
Kubizwe ukaputeni uXolani “Lolo” Ndlovu, umsekeli wakhe ongunozinti uDonovan Bernard loJoseph Tulani. Abadlali laba bayingxenye yalabo abangu-55 ababizwe ngumqeqetshi uMario Maranica, kumizamo yakhe yokubumba iqembu elizamela ilizwe ku-Africa Cup of Nations (Afcon) ka2025 ezabe iseMorocco.
Umqhudelwano lo uzaqala mhlaka 21 Mpalakazi 2025 uphele mhlaka 18 Zibandlela 2026.
UNdlovu loBernard sebake baligqoka ijesi lamaWarriors kodwa uTulani uyachinsa ukubizwa kulelibanga lomdlalo.
“Sithanda ukutshayela ihlombe abadlali bethu laba ngokubonakala ukuthi balakho ukudlalela amaWarriors. Iqembu leChicken Inn lizizwa liphakanyisiwe. Siyakujabulela ukubizwa kwabo njalo sibafisela okuhle ukuthi bangene kuqula labadlali abangu-23 abafunakalayo,” kubika isikhulumi seChicken Inn, uNkululeko Nkala.
Kusenjalo, iZimbabwe izaphatha imidlalo yeCaf Under-17 Girls Integrated Football Tournament (Gift) mhlaka 8-18 Mpalakazi, eNgoni Stadium, eNorton.
Amaqembu azadlala asebekwe kumaqoqo azancintisana kuwo, kuhlandla lakuqala lumncintiswano. Kuzadlala amaqembu ayisitshiya galombili abadlali abasakhulayo.
Ilizwe lizamelwa yiMpopoma Sports Academy (Mposa).
Inhlanganiso yeCaf yasungula imidlalo le ngenhloso yokuthuthukisa umdlalo lokuhuga amankazana ukuthi akhuthalele inguqu.
Isikhulu somdlalo wenguqu yabesifazane kuCaf uMeskerem Tadesse Goshime, uthe umncintiswano weGift Under 17 lo ubaluleke kakhulu ekuthuthukiseni ithalenta kwabesifazane.
Ahlelwe kanje amaqembu:
GROUP A: Mpopoma Sports Academy (Zimbabwe), Otjiwarongo Sports Academy (Namibia), Mamelodi Sundowns FC (South Africa), Luwinga Academy (Malawi)
GROUP B: Aquila Stars Women FC (Zambia), Okakarara Golden Ladies FC (Namibia), Refilwe FC (South Africa), Lishoeshoe (Lesotho).
