Online Reporter
YiNtatheli kaMthunywa
Amapholisa eZimbabwe Republic Police asebhobokile ngendaba yokubulawa komuntu emgodini weDGL5 eBubi, aveza ngesehlakalo esenzakala ngeSonto.
Isikhulumi samapholisa elizweni uCommissioner Paul Nyathi uthe kubotshwe onogada ababili, wathi amapholisa asukumela phezulu ngesikhathi esamukela umbiko wokuba kulesimbamgodi esidutshulwe safa omunye walimala emgodini we-Nyathi mhlaka 30 Lwezi.
Uthe amapholisa eNkayi abophe onogada ababili, uMbekezele Ngwabi oleminyaka engu-52 loElisha Matsvai oleminyaka engu-45, mayelana lecala lokubulala lokuzama ukubulala.
“UNgwabi kuthiwa udubule uThabo Ngwenya (24) ngombhobho obizwa ngokuthi yi-12 bore esifubeni lentanyeni, kwathi uMatsvai wadubula uNkosikhona Moyo (19) elihlweni lengalweni yesandleni senxele.”
Ngokutsho kwamapholisa: “Abadutshulwayo balanda abetheswacala befuna ukuthi kukhululwe umngane wabo owayebotshiwe ngoba engene emgodini lo esiyakwemba igolide ngokungekho emthethweni,” kutsho uCommissioner Nyathi.
Kodwa lokhu kutshiyana kakhulu lalokho okwenzakalayo njengokulandisa kwezakhamizi lezimbamgodi, eziveze ukuthi lababantu babezidlulela baze badutshulwe.
Endabeni le, kwathiwa uNgwenya wadutshulwa kathathu esifubeni esedlula emgodini, okwenza abantu bathukuthela kakhulu baze bakhalala ibhokisi lakhe endlini yabonogada laba, batshontsha igolide elingakalungiswa babuye baxotsha amapholisa emgodini lo. Abantu ababekhangele bathi wayesiya ezitolo nje.
Njengoba intukuthelo yayisanda, kwatshiswa amavili ezimota, kwajikijelwa ngamatshe kwaphahlazwa lamawindi. Amapholisa abaleka ngoba abantu babethukuthele ukuthi kabalandeli amacala okubulawa kwabantu. Ibhokisi lathathwa emoteni yamapholisa layalahlwa phakathi endlini yabonogada njengendlela yokutshengisa ukuthi kabathokozi.
Kwaze kwadingeka ukuthi ilunga leZanu-PF Central Committee uKhomuredi Lot Mbambo azobhula umlimo. Wakhulumisana labantu ababethukuthele, umdeni olahlekelweyo, umnikazi womgodi, wenelisa ukuthi enze umsindo wehle amapholisa asethatha isidumbu. Wabuye wachaza ngokubotshwa kukanogada kunye lokuthi umninimgodi uthe uzabhadala indleko zonke zomngcwabo abuye abhadale lemali zesibhedlela zokwelatshwa kowalinyazwayo.
Umnikazi womgodi uMnumzana Francisco Marconitti uxolisile, wagcizelela ukuthi onogada kabavunyelwa ukusebenzisa inhlamvu zeqiniso kodwa bayabe bekhangelelwe ukusebenzisa eze-pulastiki.
UCommissioner Nyathi uthe ukuchwayisisa kuyaqhubeka. “Umthetho uzakwenza umsebenzi wawo.”
