Online Reporter
ABASOLWA ababili babotshwe eDelareyville, eNorth West, eSouth Africa kulandela umsebenzi obuqondiswe ekulweni lokuthengiswa kwenyamazana zasendle okungekho emthethweni ezinkundleni zokuxhumana.
Ngolwazi olutholwe ngamapholisa, abasolwa laba babesebenzisa izinkundla zokuxhumana ukuthengisa inyamazana zasendle ngaphandle kwemvumo esemthethweni.
Amapholisa athola ulwazi lokuthi kukhona abantu ababeke isikhangiso ezinkundleni zokuxhumana besithi bathengisa inhlathu. Linyamazana yayikhangiswa ngemali engange engange-R5,000.
Ngemva kokuthola lolulwazi, abaphenyi baqalisa uphenyo lokuthola ukuthi ngubani owayefake lesi sikhangiso kanye lokuthi kwakuzokwenzakala njani ukuthengiswa kwenhlathu leyo. Umsebenzi lo wenziwa ngokubambisana kweSouth African Police Service (SAPS), iziphathimandla zezemvelo zeNorth West kanye le-Wildlife Crime Information Network.
Ukubambisana kwalamaqembu kwanceda abaphenyi ukuthi balandele umkhondo womthengisi owayesolwa ngokuthengisa inhlathu le. Abaphenyi baqhubeka becubungula ulwazi ababelutholile baze bafika endaweni yeDelareyville, lapho okwakusolwa ukuthi kwakuzakwenzelwa khona ukuthengiselana.
Ngesikhathi kuqhubeka umsebenzi wokubopha abasolwa, amapholisa aqhuba ukusetsha. Esikhwameni esiluhlaza okwesibhakabhaka esasiphethwe ngomunye wabasolwa kwatholakala inhlathu ephilayo. Inhlathu le yabanjwa ngamapholisa njalo yathathwa ukuze ivikelwe futhi ihlolwe yiziphathimandla ezifaneleyo.
Ukubanjwa kwenhlathu le kwaba yingxenye eqakathekileyo yomsebenzi wokulwa lobugebenga obuphathelane lenyamazana zasendle. Iziphathamandla zithi ukuthengiswa kwenyamazana zasendle ngaphandle kwemvumo efaneleyo kuyingozi ngoba kungabangela ukuthi izilwane ezivikelekileyo zithathwe endle ngendlela engafanelanga, okungaphazamisa imvelo lokulondolozwa kwazo.
Abasolwa laba babhekane lamacala ngaphansi koMthetho Wokuphathwa Kwemvelo. Amacala la ahlanganisa ukuba lenyamazana yasendle evikelweyo ngaphandle kwemvumo ezidingakalayo kanye lokwenza umsebenzi onqunyelwe ngaphandle kwemvumo esemthethweni.
Udaba lolu lukhombisa njalo ukuthi izinkundla zokuxhumana zingasetshenziswa ngabantu abenza ubugebengu ukuze bathengise izilwane zasendle ngokufihlekileyo. Iziphathimandla ziqhubeka zikhuthaza umphakathi ukuthi ubike abantu abasolwa ngokuthengisa izilwane zasendle ngokungekho emthethweni, ukuze kuthathwe amanyathelo afaneleyo.
Ukulondolozwa kwenyamazana zasendle ngumsebenzi obalulekileyo ngoba izilwane lezi ziyingxenye yemvelo futhi zidlala indima eqakathekileyo ekugcineni ibhalansi yendalo. Ngalokho, ukulwa lokuthengiswa kwazo ngokungekho emthethweni kubalulekile ekutheni izizukulwane ezizayo ziqhubeke zibona futhi zifunde ngazo.
-Isolezwe
