Online Reporter
KUYIMVAMA ukuthi ngesikhathi sokuziphumulela abesilisa kunye labanye abesifazana bazitholele iziphuzo bezikwejisele. Lasendulo abantu babethi ngesikhathi sokuzilibazisa banathe utshwala babo besintu. Kudala abantu babenganathi baze balale lapho umuntu wayethi angezwa ukuthi usesuthi asukume ayeziphumulela emzini wakhe.
Kulezinsuku konke lokhu sokuguqukile, abantu bakhona banatha baze bazikhohlwe lokuthi bangobani. Uthola umuntu engasazazi, abanye belele emgwaqweni sebezithambisele sokungokunye. Abanengi abanatha utshwala bakulezinsuku lobu obubizwa ngokuthi yinjengu lesithunzi kabaselaso.
Bangavele bawasuthe amabele lawo, kuba ngokunye okwenza abakhangeleyo abangabunathanga bafise lokuginywa ngumhlaba ngoba sebeyangeka ngabakubonayo.
Umuntu omdala uyabe seziphatha okosane olugcwele uchago emakhaleni. Akhihlize okwesabekayo emlonyeni ngapha lomhlaba angawuboni ukuthi kuyini ngoba uyabe esethambisa lapha lalaphaya engakutshayi indiva lokuthi ukhangelwe ngubani futhi engaboni cala. Kambe bathini abantwana nxa sebeyabona abantu abadala behamba nje bezihlambaza?
Okunye okubi yikuthi umuntu enganatha uqala ukulwa labanye abantu njalo uyabe esezibona elamandla esabekayo.
Kukanengi sisizwa ukuthi bakhona abasenkantolo ngamacala okutshaya abantu bedakiwe. Kukanengi sisizwa ngezenzo eziphica imkhumbulo eyenziwa ngabantu nxa sebekhelele uMagwebu. Abanye bayabulala abanye njalo benze ihlazo umuntu athi nxa utshwala sobuphelile ekhanda ale embe phansi icala ayabe eletheswa. Konke lokhu kuyabe kuveza mgceke ukuthi utshwala buyabe bungahambelani lawe. Yikho nje abadala babethi ubunathe ubuthela amanzi.
Utshwala kuhle ukuthi umuntu abunathe ekholisa hatshi esenza okubi. Bakhona njalo abanye abanathela abanye abantu uzwe umuntu wakhona ethi ngifuna ukuyamnathela utshwala ngoba kuyibo obumnika isibindi sokwenza okubi.
Mahlabezulu kumele sazi ukuthi nxa sinatha sicina ngaphi lokuthi lobotshwala sibunathela ngaphi ngoba abanye ngabanatha utshwala emsebenzini bazithole sebephambanise okunye baxotshwa umsebenzi. Utshwala bulungile kodwa nxa sudakwa emsebenzini uthi abaqhatshi bakho bekele njani ukukuxotsha.
Abanye ngabadakwa uzwe umuntu sokuthiwa udlwengule usane usuke uzibuze ukuthi kanti utshwala bakulezi insuku sobehlukene njani lobabunathwa ngobabamkhulu ngoba kukhulu esikubona lapha phandle.
Okunye njalo okumele labo abanathayo bakunanzelele yikuthi utshwala buyingozi kumpilakahle kungakho kumele umuntu abunathe ezikhuza ngoba ungacina susenkingeni.
