Online Reporter
YiNtatheli kaMthunywa
KUBOTSHWE abantu abanengi abasolwa ngokuba lesandla ekubulaweni komunye owesilisa weDomborutinhira, eMutasa, esabelweni seManicaland, kanye lokucuywa kwezitho zomzimba wakhe okusolelwa ukuthi zasetshenziswa emisebenzini yemithi yesintu. Abasolwa laba babotshwe ngamapholisa ngoMgqibelo odluleyo kulandela izehlakalo ezimangalisayo ezenzakala enkundleni yenduna uMutasa.
Abantu laba bathinteka kudaba lolu ngesikhathi kuqhubeka umhlangano wenkundla, lapho omunye owesifazana athi wayekhuluma ephethwe ngumoya kaLuckmore Dziire, okungumuyi owabulawayo. Owesifazana lo waveza amanye amazwi atshaqisayo mayelana lendlela uLuckmore afa ngayo ngoMfumfu ka2024.
ULuckmore, owayegula umkhuhlane wengqondo, watholakala esefile elamanxeba amanengi okubulawa ngento ebukhali. Kwabikwa njalo ukuthi ezinye izitho zomzimba wakhe zazingasekho. Phakathi kwezitho okwakusolwa ukuthi zathathwa kwakuyinhliziyo, izitho zangasese, iminwe, inzipho zenyawo kanye legazi.
Omunye wabantu ababizwa ngesikhathi kuqhubeka inkundla, uTendai Alfonso, usejele ngemva kokugwetshwa ngumthethwandaba omkhulu ngecala lokubulala uLuckmore.
Udaba lolu lwalethwa enkundleni yenduna uMutasa ngumfowabo kamufi, uDzidzai Dziire, owathi umdeni wabo ufuna izimpendulo lanxa uAlfonso wayesegwetshiwe ngecala lokubulala.
“Mhlaka 2 Mfumfu 2024, umnawami, uLuckmore, wabulawelwa eDomborutinhira. Ngathola umbiko wokuthi wayedakiwe njalo elele kuvulandi yebhawa. Kodwa ngathi sengifika lapho, ngabona ukuthi wayehlaselwe kabuhlungu. Wayelamanxeba emzimbeni wonke njalo igazi laligcwele yonke indawo. Udaba lolu lwabikwa emapholiseni,” kutsho uDziire.
Luyaqhubeka udaba ebulenjini
Uthi imibuzo emitsha mayelana lokubulawa kukaLuckmore yaqala ukuvela ngoNhlolanja walonyaka ngemva kokutshona komntanakhe, uTavonga, owagalulayo.
“Ngosuku okwafa ngalo umntanami, omunye umuntu waqala ukukhombisa izibonakaliso zokuthi ubanjwe ngumoya womnawami. Kusukela lapho, umuntu lo ubelokhu ebiza amabizo abantu okusolwa ukuthi babelesandla ekufeni komnawami,” utsho njalo.
Udaba lolu lwaba ngolumangalisayo ngesikhathi omunye owesifazana omutsha, owayegqoke impahla zabesilisa njalo esithi ubanjwe ngumoya kaLuckmore, echaza izinto athi yizo ezabangela ukufa kwakhe.
Ngokutsho kwalo owayefikelwe ngumoya, uLuckmore wayesezitolo zendawo lapho anikwa khona isitshwala lenyama. Ngemva kwalokho wanikwa inamunede kanye lotshwala okwakuthiwa kwase kufakwe umuthi ongaziwayo.
Owesifazana lo, ekhuluma sengathi ungumufi, wathi ngemva kokuzwa ubuthongo, uLuckmore wabuyela esitolo wayalala ebhentshini.
“Ngokuhamba kobusuku, abantu abanengi bangigombolozela. UTendai Alfonso wangigwaza ngengqamu entanyeni lasesifubeni, kwathi abanye labo bamncedisa bangilimaza njalo baquma umzimba wami,” kutsho lowo owayesithi ukhuluma ngomoya kamufi.
Umoya lo waqhubeka usithi igazi likaLuckmore lathathwa, njalo kwasuswa izitho zomzimba ezinengi, okugoqela inhliziyo, inzipho, iminwe kanye lesitho sangasese. Kwathiwa izitho lezi zasetshenziswa emisebenzini yobuthakathi kumbe emithini yesintu.
Owesifazana lo waphinda wathi ngemva kokubulawa kukaLuckmore, isidumbu sakhe sacina silahlwe phambi kwesitolo, lapho esatholakala khona ngemva kwesikhatshana.
Ngesikhathi kuqhubeka inkundla, abantu abanengi babizwa besolwa ngokuba lesandla ekubulaweni kukaLuckmore kanye lokususwa kwezitho zomzimba wakhe. Phakathi kwabantu ababizwayo kwakuloMargaret Marume, uJeremiah Mupunga, uKenny Chirumhanzu, uNyasha Mudeme, uTendai Alfonso, uJoseph Alfonso, kanye lamanye amadoda amabili ayesaziwa kuphela ngamabizo athi Christopher loMangandaire.
Abafakazi abambalwa batshela inkundla ukuthi babona umkhondo wegazi usiya esitolo lapho okwakusolwa ukuthi kwenzakale khona ingxenye yokuhlaselwa kukaLuckmore.
UMargaret Marume wavuma ukuthi uLuckmore wayesesitolo ngosuku afa ngalo, kodwa waphika ukuthi wayelolwazi mayelana lokubulawa kwakhe.
“Sasipheke isitshwala sabathengi esitolo engisebenza kuso. ULuckmore wafika wacela ukudla kuJoseph, owayesidla ngaleso sikhathi. Wanikwa ukudla, wakudla wasesuka wahamba,” kutsho uMarume.
UMarume wathi wezwa ngokufa kukaLuckmore ngemva kwesikhathi.
“Ngafonelwa ngatshelwa ukuthi umuntu othile wayetholwe esefile. Ngatshela umuntu owayengifonela ukuthi ngangingafuni ukufonelwa ebusuku ngitshelwa izinto ezinje,” utsho njalo.
Omunye owayesolwa, owaziwa kuphela ngokuthi nguShupikai, waphika imibiko yokuthi nguye owanika uLuckmore utshwala ngalobo busuku.
UJenny Dziire uthi umdeni wabo wawungakaneliseki ngendlela udaba lolu olwaluphathwe ngayo, lanxa uAlfonso wayesegwetshiwe ngecala lokubulala.
“UAlfonso watshela inkundla ngesikhathi kuqhubeka icala lakhe ukuthi wayengenzanga isenzo lesi yedwa. Sifuna ukwazi iqiniso lonke ngalokho okwenzakala esihlotsheni sethu kanye lokuthi bakhona yini abanye abantu abathintekayo,” utsho njalo.
Umdeni uphinde waveza ukukhathazeka ngemibiko yokuthi kwakulabantu ababefake imali ukuze bazame ukukhulula uAlfonso ejele. Bathi udaba lolu ludinga ukuthi amapholisa enze uphenyo njalo.
“Sikholwa ukuthi kungenzeka kube lokungenela kwabanye abantu, njalo sifuna ukuthi zonke lezizindaba ziphenywe ngokupheleleyo,” kutsho uJenny.
Ngemva kokulalela udaba lolu, induna uMutasa waludlulisela emapholiseni ukuze kwenziwe uphenyo olujulileyo.
Amapholisa ayekhona ngesikhathi kuqhubeka inkundla athatha abantu ababebizwa besolwa ngalolu daba ukuze babuzwe imibuzo, ngesikhathi uphenyo luqhubeka.
