admin
Ethel Ncube
KULABAZALI bemhlubulweni ongezansi yelizwe asebeveze ukukhathazeka ngenani labantwana abasweleka ngenxa yesifo senhliziyo kubangelwa yikungafinyeleleki kwamaphilisi kanye lemitshina yokuhlolwa.
Kubikwa kusukela umnyaka wonalo uqala sokulabantwana abalitshumi asebefile kubangelwa yisifo senhliziyo esibizwa ngokuthi yi-Congenital Heart Disease.
Abazali abalabantwana abazalwa belesifo senhliziyo lesi, kubikwa sebebumbe inhlanganiso yeBrave Little Hearts ngenhloso yokuthi bancedisane ngemali kanye langemibono nanko phela abantwana laba kumele basiwe esibhedlela seHarare lapho abangathola khona usizo.
Ekhuluma lentatheli uNkosazana Tendai Moyo ongomunye umzali owalahlekelwa ngumntwana kubangelwa yisifo lesi uthe:
“Silohlupho lapha njengabomama, sidinga ukuba sibambisane lenhlanganiso ezitshiyeneyo ukuze abantwana bathole usizo singatshiywa ngabantwabethu.
“Umama uyabeletha esibhedlela ahambe endlini engakwazi ukuba umntwana angaba lesifo senhliziyo kuze kubonakale sokulesikhathi sokufuneka izimali zemithi, ezokubona odokotela lokunye okunengi okutshiyeneyo.
“Ngenxa yesimo somnotho lapho konke okukhwela izinto malanga onke abazali bacina belahlekelwa ngabantwana ngoba lapho abangathola khona usizo kuseHarare.
“Esikucelayo yikuba esibhedlela esikhulu seMpilo kube leWadi yabantwana abalesifo senhliziyo bodwa ngoba abafuni moya, abafuni kutshisa kakhulu njalo akumelanga bakhale kakhulu, sicela sincediseke kulokho lathi njengabazali sizimisele ukusebenzisana ndawonye,” kubika uNkszn Moyo.
Uqhubekele phambili eveza ukuba okunye okubalulekileyo yikuba abantu bafundiswe ngesifo lesi.
“Sifisa njalo ukuba ulwazi ngesifo senhliziyo lufinyelele endaweni ezitshiyeneyo. Ngabe kuyavumakala kuhanjwe endaweni ezitshiyeneyo abazali befundiswa ngesifo lesi (Congenital Heart Disease) ukuze omama bonke babe lolwazi nxa sebebona izitshengiselo zakhona.
“Okunye okusithwalisa nzima yikuthi usizo ngezifo zenhliziyo lutholakala esigodlweni kuphela, nxa kungehlula lapho umzali kuyabe kumele aye emazweni okubiza inkalakatha zemali. Kungakho sicela ukuthi njengeParirenyatwa kube lesinye isibhedlela lapha koBulawayo ukuze omama bengahambi imango emide ngoba kunzima ukuhamba umango lomntwana emncane njalo lemali zokugada ziyahlupha,” kutsho uNkszn Moyo.
Uqhubekele phambili esithi bakhona abadinga ukuyahlinzwa kodwa abehlulwa zimali.
“Ngikhuluma nje kulabantwana abalitshumi abasesimeni esibi okumele bayehlinzwa, abadinga usizo masinyane kodwa kusilela imali,” kubika uNkszn Moyo.
Intatheli ibuye yaxhumana lomunye umzali olomntwana ophila lesifo senhliziyo uNkosazana Sibekiwe Maduma oveze ukuba ukhangelane lobunzima bokuthenga imithi.
“Ngikunhlanganiso yeBrave Little Hearts njalo ingiphathise ngemali yokuya eMutoko ukuze umntwana ayehlolwa njalo ngafika ngabhalwa phansi ukuba kumele ayehlinzwa elizweni le Italy. Ngahamba-ke wayahlinzwa ngaphenduka laye bangibhalela imithi.
“Imithi le ngiyithenga maviki onke, akumelanga iswelakale okokuthi ngenyanga ngiyabe ngifuna imali efika phose RTGS$$1 000 eyemithi yomntwana njalo iyakhwela kungakho ngibhekane lobunzima ngoba kangisebenzi,” kutsho uNkszn Maduma.
Iphephandaba likazulu lixhumane loMphathimtambo obona ngokwenzakala koBulawayo uKhomuredi Judith Ncube ngesikhalazo sabazali abalabantwana abalesifo senhliziyo oveze ukuba udaba lolu lwafika kuye.
“Indaba yabazali abalantwana abalesifo senhliziyo yafika kimi kodwa ngayidlulisela kugatsha olubona ngezempilakahle njalo ngike ngalulandelela bathi basaluhlolisisa,” kuphetha uKhmrd Ncube.
Online Reporter