Watsha Tsotsi: Badingwa yi-ZRP laba Mahlabezulu

NYAKENYE siphethe lowomnyaka sikhalaza ngamacala okutshayana lokulwa lapho esicebisane khona ukuba ukulwa kuyabulala bakwethu. Lonyaka sizaqala ngokukhuthaza abadingwa ngamapholisa ukuthi bayozigeza ukuze bakhululeke ku-2016. Siyabonga ngemibono yenu ekhomba ukuthi ukulwa kubi, inkalakatha yikuzikhuza ngoba wonke umuntu ulalo ulaka.

Ukuthula kulethwa yikuzithiba. Phela angithi abantu bavele balemibono ehlukeneyo njalo kulilungelo labo ukubona izinto ngelihlo lamunye ngamunye. Ukubona ndawonye kudinga ukubekezela, umbono obanzi lokuzwisisa phakathi kokunye.

IZimbabwe Republic Police (ZRP) Kamativi idinga uJairos Ngwenya oleminyaka engu 34 ubudala obehlala emzini kaVincent Muzamba eLubanda koChief Saba, eBinga. UNgwenya wetheswa icala lokudlwengula owesifazana ayembize ethi uzomthandazela. Icala leli lidalwe ngoMpalakazi wanyakenye njalo imithandazo yonke ayeyithembise umamangala kayisafezwanga. Yeyi madoda! Isono yisono bakwethu.

IZRP Dete yona idinga uVambe Emmanuel oleminyaka engu-31 eyokuzalwa oweba amafutha emota (diesel) ayi-400 litres. Amafutha la abiza intengo engafika ku-$500-00. Kubikwa wayimunya emtshineni wenkampani ye-Gwayi Clay Products i-bulldozer. UVambe mude okwe-1,5m elomzimba ophakathi laphakathi emhlotshazana ebusweni. Wacina ukubonakala esahlala ku 6658 ePumula North, koBulawayo.

IZRP Lusulu ifuna uRichard Dube olenombolo zesithupha eziveza ukuba udabuka eLupane, 41-065259-A-41. UDube yisakhamuzi esihlala esigabeni sakoAmos Ngwenya eChipale, Lusulu. Umhlophe, uleminyaka engu-32 yokuzalwa, mude okwe-1,7m njalo uthanda ukugcina inwele. Wazalwa mhlaka 19 Nhlangula ngomnyaka ka 1983. Kubikwa izifundo zakhe ze-secondary waziqhuba eChipale Secondary evele elolaka. Okwamanje, ubalekele icala lokutshaya omunye umuntu kabuhlungu wamtshiya elimele isandla senxele.

UJim Mabika (37) udingwa yi-ZRP Victoria Falls ngecala lokubulala impahla zendlini ngolaka langochuku ngemva kokuxabana lomkakhe. Lokhu kwande ukwenziwa ngabafazi betshayelela izimbiza, ama-TV lokunye ngolaka olukhulu engasakhumbuli lokuthi yinotho yabo. Dukuduku, umoya lo usubalekile, uMabika usele enanzelela ukuba wonile, watshaya utshani ebalekela icala lemuli yakhe! Icala leli libizwa ngelika-Malicious Damage To Property kuyikwephula u-Section 140 weCriminal Law (Codification and Reform) Act Chapter 9:23. Akukhathalekile ukuba ubulele impahla kabani, licala kuphela. UJim wabulala i-wardrobe, umabonakude, isitofu (two plates), i-decoder le push-tray. UMabika mude okwe 1,72m njalo wayehlala ku 2624 elokitshini leChinotimba, edolobheni leVictoria Falls.

Ulomzimba ophakathi laphakathi njalo umnyama ebusweni. Udabuka eMasvingo njengalokho okumunyethwe yinombolo zakhe zesithupha u 83-090678-D-83. Uyise nguJack Mabika wasesigabeni sakoKwangwari ngaphansi kukanduna uNyakunhuwa esiqintini sakoNdanga eMasvingo.

Isibaya sesizwe bakwethu! KuloSidumiso Nkomo (39), 08-071117-K-53 odabuka eNkayi obalekele icala lokutshontsha lokuthengisa inkomo ezingu-54. Inkomo lezi zibiza $27 000 zonke! Ubehlala ku-plot number 2 epulazini leOscardale eInyathi. Kubikwa wathengisa inkomo zonke ezazikulelo pulazi kusukela ngomnyaka ka2012 kancane kancane waze wabonakala ngoMpalakazi nyakenye umnikazi ethekele kulelopulazi. UNkomo mfitshane okwe-1,5m, umhlophe kukanti uthanda ukuhlala ephucile ikhanda. Wafunda eSihlengeni Primary eNkayi andubana agqibe izifundo zakhe ze-secondary khona eNkayi. Uke wayahlala eUnited Kingdom (UK) engakasebenzeli eOscardale. Uyise nguLouis Nkomo ohlala ku-Ward 5 eSihlengeni ngaphansi kwenduna uMadliwa eNkayi.

Engizethule lapha yizibonelo nje kundaba zakoCALA loyise uSigilamkhuba. Ngiyazi zinengi ezenzakale lapho elikhona. Zilwiseni sithi sisiyafika kumnyaka ka2020 sibe singasela macala ezigabeni zethu. Ukudlwengula kubi njalo ngalesisikhathi sekhefu lokuvalwa kwezikolo, kumele sigcine abantwabethu abangamankazana ukuze bafunde bengelampazamo. Kulezi insuku kudinga abantu abafundileyo (abesilisa labesifazana ngokufanayo), abenelisayo ukuzimela mpo sikhathi sonke. Abadlwengulayo yibo abazingelwa nsukuzonke ngumanyano kazulu lamapholisa ngoba betshabalalisa isizwe ngemikhuhlane lokubulala ikusasa labantwana lesizwe sonke jikelele.

Ukutshaya ngithemba sikuphathe kakhulu ngaphambilini. Kuqondana ngqo lolaka lokuxabana ezindlini okwenze uJim ocine ebulala impahla. Inengi libulala abantu ngokwabo. Kasithandazeleni ukuthula sazi ukuba kuyasiza ukuthethelela ukuze lathi sithethelelwe ngoba akekho ongcwele emhlabeni. Singathethelelana, kubalula ukulondoloza ukuthula.

Ukweba kulicala njalo kuyisono. Kutshabalalisa impahla lenotho yabanye njalo kuvula amajele, kubize ubuyanga lezimfa. Ukutshontsha inkomo kunzima ngoba isigwebo sakho yiminyaka engu-9 kusifuyo sinye ngasinye.

Ngamafitshane, kasiphileni impilo emsulwa sizame ngamandla wonke ukuvikela icala. Siyambonga uThixo ngesipho somphefumulo ngoba njengesifiso sethu sokudibana lonyaka, sesikhona. Lisale, sidibane kwelizayo.

Thumelani imibono yenu kunombolo yeWhatsApp u– 0783 185 092 kumbe ebulenjini ku – [email protected] kumbe [email protected].