adminUKAPUTENI weKaizer Chiefs uSiphiwe “Shabba” Tshabalala uxwayisa amaqembu agijima kuPremiership ngobungozi baMakhosi.
IChiefs ithwale kanzima ngomzuliswano wokuqala. Leli qembu lilahlekelwe yizicoco ezimbili. Litshaywe yi-Ajax Cape Town kowamanqamu weMTN 8 eNelson Mandela Bay Stadium, ePort Elizabeth.
Kuthe kusenjalo laphinda lathelwa othulini yiMamelodi Sundowns ngo 3-1 kowamanqamu weTelkom Knockout eMoses Mabhida Stadium, eThekwini.
Amakhosi avale ehlezi endaweni yesine ku-logu ngamaphuzu angu-21 emidlalweni engu-12. UShabba exoxa lentatheli ngemuva komdlalo weChiefs leSundowns eMabhida uveze ukuthi ngehlandla lesibili lesizini bazobuya bengasadle nkobe zamuntu.
“Akusimqeqetshi wethu kuphela (uSteve Komphela) ophatheke kabi ngokutshaywa emidlalweni emibili ilandelana.
Sonke siphakethe kabi. Lapha ngibala labalandeli beqembu abahlale bebheke ukuthi sinqobe ngaso sonke isikhathi.
Silahlekelwe yizicoco ezimbili kodwa sizoqhubeka lokusebenza kanzima. Siyaholelwa ngokudlala ibhola futhi ngomzuliswano wesibili angingabazi ukuthi sizobuya ngamandla,” kutsho uTshabalala.
IChiefs izobuyela emidlalweni ye-Absa Premiership ngomdlalo onzima. Izokwamukela iMamelodi Sundowns e-FNB Stadium ngoMgqibelo. Umdlalo lo uzoqala ngo-8.15 ebusuku. ISundowns ihlezi esiqongweni.
Ngakolunye uhlangothi Amakhosi yiwo avikela isicoco seligi asihlwithe kuSundowns ngesizini edluleyo. UKomphela ulomthwalo onzima. Uthathe intambo kuStuart Baxter ekuqaleni kwesizini.
UBaxter utshiye enze umsebenzi oncomekayo ePhefeni ngoba uthwale indebe ezine kumasizini amathathu awahlale kuChiefs. Unqobe izicoco ezimbili ze-Absa Premiership, eseNedbank Cup leseMTN 8.
UKomphela uhlulekile ukuvikela isicoco seMTN 8 esinqontshwe yi-Urban Warriors. Njengamanje uhlalelwe ngumqanso wokuvikela eseligi. NgoNhlangula uzophinda akhokhele iChiefs nxa isidlala kuCaf Champions League.
“Sikhangele ukwenza kahle kuChampions League. Ngesizini edlule siphange saphuma. IChiefs iliqembu elikhulu ngakho kumele sikutshengise lokho nxa sesidlala lamanye amaqembu angompetha emazweni awo. Iqembu lethu libophele abadlali asebeke badlala iminyaka e-Afrika. Lathi siliqembu sesidlale ndawonye isikhathi eside,” kusho uTshabalala.
Imi kanje imidlalo ezayo yeAbsa Premiership kulimpelaviki:
NgoLwesihlanu: Ajax Cape Town v Bloem Celtic (Cape Town Stadium, 8pm).
NgoMgqibelo: University of Pretoria v Jomo Cosmos (Tuks Stadium, 3.30pm);
Orlando Pirates v Platinum Stars (Orlando Stadium, 3.30pm); Free State
Stars v Golden Arrows (Goble Park, 3.30pm); Kaizer Chiefs v Mamelodi Sundowns (FNB Stadium,
8.15pm); Black Aces v Polokwane (Mbombela Stadium, 8.15pm).
NgeSonto: SuperSport United v Maritzburg Utd (Peter Mokaba Stadium, 3.30pm); Chippa United v Bidvest Wits (Nelson Mandela Bay). — Ubulembu
Online Reporter