adminNkosilathi Sibanda
AKUSELA muntu ongaziyo ukuthi iTsholotsho isivuke khwatshu kumdlalo wenguqu. Ngalokhu, kubikwa sekubangiswana ukuqoqwa kwemincintiswano yokusekela ithalenta lomdlalo elisabalale isigaba lesi.
UMthunywa ubikelwe kuliviki ukuba sekuqoqwe inkezo yeTOP 4 edibanisa amathimu amane ahluphileyo ngokunqoba kuzo zonke izigaba zomdlalo eTsholotsho.
UMelusi Ndebele ongomunye weziphathamandla zeTsholotsho District Football Associations ubike ukuthi mhlaka 27 kuNhlolanja isigaba sabo sizahlanganisa abalandeli benguqu ukuzobukela iTsholotsho FC idibana lamaqembu eDinyane, iHashi leTsholotsho Pirates. ITsholotsho Pirates izitshaya isifuba ngokuthi ngesizini ezayo ikhuphuka iyedlala kuligi ephezulu.
“Sizaqoqa umkhosi lo ngenjongo yokuthi sibuthanise abalandeli benguqu lapha eTsholotsho. Umncintiswano lo udlalelwa ngamaqembu amane kuphela njalo sikhangelele ukuthi ubekhona ekupheleni kukaNhlolanja.”
Kusenjalo, iqembu elikhulu eTsholotsho, iTsholotsho FC isiqale amalungiselelo esizini yeCastle ngesivuvu. Ithimu le, esinde kancane ukuphuma kuPSL ibika ukuthi ayisoke izihluphe ngokudinga abadlali abatsha kulisizini.
Umqeqetshi wayo uLizwe Sweswe ubike ukuba uyasuthiseka ngabadlali alabo.
“Lonyaka ngumnyaka weZiqholo zeZhwane. Akula okungasibuyisela emuva kumkhankaso wethu wokuya phezulu.”
Umqeqetshi lo uthe loba belokuthaba ngokwenelisa ukugcina indawo kuPSL, bayazi ukuthi ukudlala kuligi le akusimthwalo olula.
Ithimu le loba isesekhona kuligi ephakemeyo, ihlutshwa yikuthi iyehluleka ukusebenzisa inkundla yayo nxa isekhaya.
Online Reporter