Online Reporter
Ethel Ncube
KULAMADODA amahlanu e-Durban Mine eNyathi okubikwa atshaya abulala umuntu qede athwala isidumbu ayasifihla ngaphansi kwemota ngenhloso yokuba sigxotshwe.
Isehlakalo lesi senzakale kuviki ephelileyo.
UThembani Nkomo (24) kucatshangelwa ukuthi wabhaxabulwa ngamadoda amahlanu ngezigodo umzimba wonke athi uErich Nkomo, Mbekezeli Mpofu (21), Ephithule Ncube, Hlayolehle Ngwenya, Dumani Mhlophe endaweni yamabhizimusi yeSimpson, eDurban Mine eNyathi, mhlaka 13 Mpandula qede bathwala isidumbu bayasifaka ngaphansi kwegonyethi eyayimile.
Kubikwa umtshayeli wegonyethi wasusa imota engazange ayihlole wasegxoba isidumbu leso okwenza ekuqaleni kwabonakala sengathi yingozi yomgwaqo.
Kucatshangelwa ukuba abetheswacala njengoba basebebalekile kodwa amapholisa ekuchwayisiseni kwawo athola ukuthi ubulewe kwasekubotshwa ababili eGokwe kukanti abanye abathathu lokhu kusathungathwa umkhondo wabo.
Isikhulumi samapholisa eMatabeleland North uInspector Glory Banda,. ubike ukuba indaba le isachwayisiswa.
“Indaba kamuyi owabulawayo wayafihlwa ngaphansi kwemota eyayimile siyamukele. Sekubotshwe amadoda amabili, abathathu babaleka, siyabadinga.
Ongabe elolwazi lwalapho esingabathola khona kazise amapholisa aseduzane laye.
“Sicela uzulu nxa angaba lengxabano bakhulumisane kuhle kungelakulwa kumbe badinge omunye ongaxazulula udaba lwabo kulokwenza udlakela olucina ludala ukulahleka kwemiphefumulo.
Asihlonipheni impilo ngoba iqakathekile,” kubika uInsp Banda.
Kubikwa ababili laba sebeke bamiswa emthethwandaba weNyathi njalo bazaphenduka mhlaka 3 Mfumfu.
