admin
Cornelius Luphahla
KUBE yisisanasana ubukhwa bezinja kwenye itshabhini eselokitshini leCowdray Park koBulawayo lapho amanye amanina abhuqane aze adabulelana izigqoko ebanga utshwala abutshontshileyo.
Impi le yenzakale ngoLwesithathu ntambama kuviki ephelileyo lapho uNkosazana Sylvia Moyo adindane khona loNkosazana Lizzy . . . bebanga ukuthi uLizzy unatheleni yedwa utshwala ababutshontshe bonke etshabhini le.
Umfakazi oqotho oziveze ngokuthi nguJoe nje kuphela ubikele intatheli ukuthi amanina la ayengabonwanga ngumuntu ngesikhathi bentshontsha utshwala kodwa azichaza esesilwa.
“Sonke esasinatha koSis Doe kasibabonanga omama laba betshontsha utshwala lobu kodwa sabona uSylvia sengasekho waphenduka sedakiwe.
Ngemva kwalokho uLizzy wamdonsela phandle sezwa sokungumsindo omkhulu.
“Saphuma phandle sathola bevubana kabuhlungu uSylivia seze wadatshukelwa yisiketi loLizzy sesele lesikhindi kuphela.
Sazama ukulamula sehluleka njengoba sasingamadoda wodwa.
“Kwaze kwalamula uSis Doe onguye owabalamula ngokubatshaya ngemvubu,” kuveza uJoe.
UJoe uqhubekele phambili wathi umnini-tshabhini lo wabangenisa endlini wababuza ukuthi babangani ngapha ebatshaya baze baveza abakubangayo.
“USis Doe wabangenisa endlini yakhe benqunu benjalo wabatshaya ngemvubu ebabuza ukuthi babangani uLizzy waveza ukuthi uSylivia ubaleke le two keys abayitshontshe bonke ngesikhathi becelwe ukuthi basale bekhangele utshwala,” kutsho uJoe.
UNkosazana Lizzy ebuzwa ngale indaba walile ukuthi nguye owatshontsha utshwala wathi yena wabona umngane wakhe ebutshontsha yikho wamtshaya.
“Mina kangizange ngitshontshe utshwala kodwa umngane wami nguye owabutshontshayo ngamdinga ngamswela ngifuna ukumbiselisa.
Into eyenza salwa yikuthi ngathi ngimbuza ukuthi sebuse ngaphi utshwala buka Sis Doe njengoba sedakiwe wasengitshaya lami ngambisela sahle salwa.
“Kwathi ngesikhathi uSis Doe sesitshaya ngasengikhuluma ukuthi uLizzy utshontshe utshwala yena wathi sitshontshe sonke,” kutsho uNkszn Lizzy.
USis Doe ebuzwa ngale indaba uchaze ukuthi yena ngeke akhulume lutho ngoba akumniki mali njalo kafuni kuphuma kuphephandaba.
“Mina ngeke ngikhulume lutho lawe ngoba kangisoze ngithole imali kulokho.
“Okunye njalo ngicela ungangikhiphi kuphephandaba ngoba uzangivalela into zami ezinengi,” kuphetha uSis Doe.
Online Reporter