admin
Johas Moyo
IZAKHAMIZI zelokitshini leNew Luveve edolobheni lakoBulawayo zisele zitshe amathe kulandela ukubonakala kwenkakha kwelinye igaraji elilapho okwenza izakhamizi zizibuze ukuba inyamazana ifike njani kule indawo.
Isimanga lesi esingundabamlonyeni elokitshini leli senzakale ngoLwesihlanu kuviki ephelileyo lapho inkakha le ephume kwelinye igaraji okulungiswa izimota izihambela cala celeni.
Ekhuluma lentatheli ngesiga lesi uNkosazana Thandekile Nxumalo uveze ukwethuka ngokubona inyamazana le emphakathini.
“Lokhe ngingelankani ngenyamazana le yeganga ebonakale emphakathini. Thina sazi inyamazana le ihlala egangeni njalo lapha akulaleganga eduze esingathi yavela khona kungakho kuyasimangalisa ukuthi pho-ke yavela ngaphi,” kutsho uNkszn Nxumalo.
Esinye njalo isakhamuzi sakule indawo uMnumzana Fanyana Vodloza uthe wayekhona inkakha le ithutsha egarajini njalo kalankani ngesimanga lesi asibonayo.
“Ngangikhona mina kuphuma inkakha egalajini lezimota, lokhu ngizibuza ngiziphendula ukuthi yayivela ngaphi egarajini lapha.
“Mina inkakha kangazi iyinyamazana ebonakala lula yikho nje isithi ingabonakala abantu babayiphe umongameli welizwe njengesipho,” kutsho uMnu Vodloza.
UMthunywa uxhumane loMnumzana Bekezela Dube oyisazi kwezamasiko wabuzisisa kabanzi ngenhlalo yalinyamazana wezwa ukuba ihlala egangeni njalo endaweni ecatshileyo lapho eyabe isidla khona izinanakazana ezincane.
“Ngokwazi kwami inkakha yinyamazana ehlala khatshana labantu njalo egangeni lapho edla khona izinanakazana ezincane kanye lezibungu.
Isimanga yikuthi leyo ngenjani ehlala ebantwini iphambana labo ingabesabi.
“Leyo kunzima ukuthi kuthiwe yinkakha yeganga njengoba abantu bebamba izihlahla ezimbi kungenzeka ukuthi iphambanisiwe lapho ebilokuthula khona yaphuma yikho okwenze icine iphambanisa inhlalo yezakhamizi,” kutsho uMnu Dube.
Ebuzwa ngokuthi inkakha le yasiwa ngaphi uKhansila Thamani Moyo uthe inkakha le yathathwa ngamapholisa.
Online Reporter