admin
Cornelius Luphahla
BAPHAKATHI kwetshe lembokodo abantwana bezigabeni zeMafa, Somgolo kanye leMlonyeni eLupane, nanko phela bahamba umango omude besiya esikolo, yikho nje izakhamizi zakule indawo sezicela ukwakhelwa isikolo.
Abantwana bezigabeni lezi abenza imfundo yaphezulu bafunda eZwangendaba Secondary okungaba ngumango odlula amakhilomitha angu-20 okwenza inengi labo lekele ukufunda kuthi abanye behlelwe zingozi besendleleni njengoba behamba eguswini.
Intatheli ivakatshele kule indawo yakhulumisana loNkosazana Soneni Ndlovu oyisakhamuzi kule indawo oveze ukuthi abanye abantwana abafundi ngenxa yomango.
“Abanye abantwana bayekela isikolo ngenxa yomango omude sebebona kungcono ukuthi bazihlalele. Abantwana abasuka eSomgolo bahamba amakhilomitha angu-15, abasuka eMafa bahamba amakhilomitha angu-17 kuthi abasuka eMlonyeni bahamba amakhilomitha afika 20 besiya esikolo.
“Umntwana ufika sediniwe esikolo ehluleke lokulalela, aphinde angene umango lo futhi ntambama okwenza ngelanga ahambe umango ongamakhilomitha angu-40. Pho umntwana engaphumelela njani ezifundweni,” kulandisa uNkszn Ndlovu.
Esinye isakhamuzi sakule indawo uMnumzana Henry Moyo sichaze ukuthi abafundi laba ungaze ubadingele indawo zokuhlala kusuka kube nzima ukuba baphumelele ngoba behlala bodwa.
“Abantwabethu ungaze ubadingele indawo zokuhlala ngenjongo yokuphungula umango kusuka kube nzima ukuba baphumelele ngoba bayabe behlala bodwa okudala ukuthi bengaziphathi ikakhulu amankazana. Lokhu kudala ukuthi inengi labo lizithwale lisafunda ngakho kudingeka ukuthi kube lesikolo esiseduzane,” kuchaza uMnu Moyo.
Ekhuluma loMthunywa uMnumzana Stanley Mtshaya Sibanda ubike ukuthi abantwana laba bahamaba eguswini elilezinyamazana eziyingozi besiya esikolo.
“Abantwabethu bahamba eguswini elesabekayo elilendlovu, impisi lezingwe njalo kwesinye isikhathi kuba lezilwane.
Ngakho kusobala ukuthi abantwana bafunda besengozini ngoba nxa bevela esikolo kuyabe sokusebusuku njalo yikho okuhamba khona lezizinyamazana.
“Umntwana umcina ngeSonto ntambama uze uyembona ngoMgqibelo ekuseni ngoba evuka ebusuku aphenduke ebusuku,” kutsho uMnu Sibanda.
Usobhuku omkhulu wakule indawo uMnumzana Albert Moyo ubikele intatheli ukuthi indawo yokwakha isikolo balayo ngakho sokusele ukuthi iForestry Commission iyamukele.
“Indawo yokwakha isikolo silayo ngakho osokusele yikuthi sibikele abekhansili bazosiqandela indawo le. Okunye njalo njengezakhamizi sesiqalisile ukukhipha izamende zokwakha isikolo sethu,” kuveza uMnu Moyo.
UMthunywa uzwe njalo ukuthi izakhamizi lezi zathi zibikela inhlanganiso yeForestry Commission ekule indawo inkokheli zayo zathi isikolo lesi asifuneki endaweni yazo.
UMlawuli weForestry Commission esabelweni seMatebeland North, uMnumzana Armstrong Tembo ubikele uMthunywa ukuthi izakhamizi lezi kufanele zibabikele loludaba ukuze zakhe isikolo.
“Izakhamizi lezi kazikasibikeli ngenhloso yazo yokwakha isikolo kule indawo ngakho kufanele zilandele umthetho weForestry Commission zingasakhi zingayibikelanga,” kutsho uMnu Tembo.
UKhansila wakule indawo uMnumzana Steven Mganyulwa Ngwenya uveze ukuthi isifiso sabo yikuthi uHulumende lenhlanganiso ezizimele zodwa zingenele zibancedise.
“Njengoba sesiqalile ukulungiselela ukwakha lesisikolo isifiso sethu yikuthi uHulumende angenele asincedise ekwakheni kanye lenhlanganiso ezizimele zodwa silesifiso sokuthi ngabe lazo ziyaphathisa,” kuphetha uMnu Ngwenya.
Online Reporter