admin
Cornelius Luphahla
IZAKHAMIZI zesigabeni seMafa eLupane zikhala ezimathonsi ngodubo lokuswelakala kwamanzi osokudala ukucuba kwezifuyo ngenxa yendlala yamanzi.
Udubo lolu solulesikhathi eside lwazihlasela izakhamizi lezi yikho nje sezibone kungcono ukuba zicele usizo lokugebha idamu ukuze izifuyo zazo zithole amanzi.
Intatheli ivakatshele kule indawo yakhulumisana lesinye isakhamuzi, uMnumzana Gwakuba Sibanda oveze ukuthi ebusika inkomo ezinengi ziyacuba kule indawo.
“Inengi lenkomo ezinsikazi ikakhulu ezindala lamathokazi alamathole andise ukucuba ebusika ngenxa yokuswela amanzi. Ngikhuluma nje khathesi ezinye seziqalile ukucuba angazi ukuthi sizazivikela njani lonyaka njengoba kusesekhatshana ukuthi isikhathi sehlobo sifike,” kuchaza uMnu Sibanda.
Esinye njalo isakhamuzi uNkosazana Silingiwe Ncube uchaze ukuthi noma nje kukhona amachibi kule indawo kodwa kawagcini amanzi.
“Amachibi alapha kawagcini manzi njalo mancane kakhulu okudala ukuthi izulu lingaze line kusiyafika uNhlangula ayabe secitshile izifuyo zethu seziswela amanzi.
“Yikho sibona kungcono ukuthi sicele uHulumende asigebhele idamu ukuze izifuyo zethu zisile,” kutsho uNkszn Ncube.
Ekhuluma loMthunywa omunye wabosobhuku bakule indawo uMnumzana Donald Dube uchaze ukuthi izifuyo zabo sezinatha emigodini lanxa iphela amanzi.
“Izifuyo kufanele ukuthi zinathe amanzi zikhululekile njalo kabili ngelanga manje kithi uhlupho yikuthi thina sizinathisa emigodini yezakhamizi ngakho akuvumi ukuthi zinathe kabili ngoba imigodi le isuka ikhulelwe ngabantu lezifuyo icine iphela amanzi.
“Noma nje zithola amanzi la kodwa ziwathola kanye ngelanga kumbe ngemva kwamalanga amabili okudala ukuthi zicube,” kutsho uMnu Dube.
UKhansila wakule indawo uMnumzana Steven Ngwenya ubikele uMthunywa ukuthi isicelo abalaso yikuthi uHulumende angenele abagebhele idamu.
“Isicelo sethu yikuthi ngabe uHulumende uyangenela asigebhele idamu ukuze izifuyo zethu zisile kuloluhlupho esilalo. Nxa engasigebhela lelidamu lezakhamizi zingasungula amaphurojekithi okuzithuthukisa,” kuphetha uMnu Ngwenya.
Online Reporter