Online Reporter
Nkosilathi Sibanda
KULABANDELI beHighlanders abakholwa ukuthi umqeqetshi uPieter De Jongh uzaphinda ukuphakamisa inkezo yeChibuku Super ekuleliqembu.
IHighlanders isikusigaba sama-semi finals omncintiswano lo, lapho ezadibana khona leHighlanders.
Iqembu leli laba yintshantshu yeChibuku Super Ngesizini ka-2019.
Kulandela ukufinyelela kuma semi finals, inqoba iScottland nge 2-1 kumbekwa, abalandeli bagijimele ukubonga uDe Jongh, bemtshayela ihlombe ukuthi ubajabulisile ngokukhuza kwakhe iqembu.
Kuthe kuphela umdlalo, abalandeli bangene phakathi kwenkundla beseqa ngenjabulo. Ngemva kwalokhu bahambe eHighlanders Club House lapho abafike bahlangana lomqeqetshi lo, abamnika ibizo elithi nguHlabangana.
Bathethe imfanekiso laye, bemtshela ukuthi bathembe yena.
Umsekeli omkhulu uDuduzo “Teekay” Sibanda uthe: “Lo nguye umqeqetshi esimthembileyo. Uphendukise ukukholwa kithi. Uzaphinda ayithwale inkezo yeChibuku. Yithi intshantshu lonyaka.”
UThabiso Gundu Dube ubike ukuba ngabe iHighlanders yamqhatsha kudala uDe Jongh, iqembu belizabe lincintisa lakuligi, lihlezi esiqongweni.
“Sithabile. Asikaze sithokoze njengalokhu lonyaka. Siyambonga umqeqetshi ngokuguqula iqembu. Ngabe wabuya ekuqaleni komnyaka, ngabe sikhuluma ngokunye.”
USabelo Sihwa oweNkulumane uthe ukunqoba inkezo yeChibuku Super kuzaveza ukuthi iHighlanders liqembu elikhulu.
“Besingabalwa. Besidelelwa ngoba sehlulekile ukwenza kuhle kuligi kodwa, khathesi sesikhangelele okuhle ngokudlala kumkhankaso weChibuku.”
Kumdlalo leScottland, unozinti u-Ariel Sibanda uvale amabhola embekwa amathathu. Zombili bezilingene nge 2-2 kufika umzuzu wesi-90.
IScottland ikhuthe imbekwa emine.
Kuqale ngokuhlohla izethekeli, kuvula uKingsley Mureremba kwalandela uKhama Billiat. IBosso iphendule ngamabhola ahlohlwe nguLearnmore Muyambo lo Andrew Mbeba.
Ekhuluma ngokunqoba lokhu, uDe Jongh uthe: “Ngibonga abasekeli abagcwalise inkundla. Bakhuthaze iqembu.”
