admin
Msilisi Dube
ABADLALI besifazane abalolwazi olujulileyo kwezokulingisa edolobheni lakoBulawayo kubikwa bayasilela njalo lokhu kungenye yembangela yokuwa kohlonzi lwemidlalo ephekwa kulelidolobho.
UStyx Mhlanga, ongumlobi njalo engumqondisi wemidlalo uthe kulesikhexe esikhona kwezemidlalo esibangelwa yikusilela kwabalingisi besifazana asebevuthiwe kwezokulingisa.
“Ukusilela kwabadlali besifazane sekubangele ukuthi ezemidlalo lapha koBulawayo zingayiphambili ngoba inengi labo lingafika izinga lokwenda lihle litshiyane lomsebenzi wokudlala.
“Abanye basuka baliswe ngomnyeni babo ukuqhubeka ngomsebenzi wokudlala ngoba abesilisa abanengi balengqondo yokuthi ukulingisa ngumsebenzi ongelasizotha emphakathini,” kuveza uMhlanga.
Ngalokhu uMhlanga ubuye wakhuthaza umphakathi ikakhulu abesilisa ukuthi bamukele inguquko esikhona kumpilo yakulezi insuku — inguquko yokwamukela ukuthi abesifazana sebelakho ukuphatheka kumicimbi eminengi eyenzelwa umphakathi kugoqela leyezokudlala.
“Umsebenzi wezemidlalo ngowokwakha abantu. Kubalulekile ukuthi labesifazane kungakhathalekile ukuthi bangakanani, sibabone labo bephatheka ngokugcweleyo kwezokudlala.
“Labo abesifazane akumelanga bazikhangelele phansi kumbe bavumele ukuncindezelwa ngabantu emphakathini ngoba khathesi sonke sesilingana kungenani lobulili,” kugcizelela uMhlanga.
Banengi abadlali besifazane asebasukumela phezulu kwezokudlala kuleli idolobho. Laba bagoqela uSarah “Tashi” Mpofu, Sithandazile Dube, Precious “Ntokozo” Makhulumo, Thoko Zulu, Yengiwe “Mambatha” Ngwenya kanye loBarbara Makhalisa phakathi kwabanye.
Online Reporter