Online Reporter
Zimpapers Sports Hub
UMQEQETSHI weSimba Bhora uJoel Luphahla uthe uzahlala eqaphele nxa bedibana leDynamos ngoba leliqembu lazi kuhle ukuthi ucabanga njani, ngakho kumele abe lamaqhinga amatsha.
ULuphahla uveze lokhu ngesikhathi ekhuluma ngamalungiselelo omdlalo phakathi kwamaqembu womabili oweCastle Challenge Cup, ozabe ungoMgqibelo enkundleni yeRufaro, eHarare.
Umdlalo lo yiwo ozavula isizini yeCastle Lager Premier Soccer League yalonyaka. ISimba Bhora yaba yintshantshu yeligi le ngo-2024.
ULuphahla uthe kunzima kuye ukuhlangana leDynamos, iqembu akade eliqeqetsha ngomnyaka odluleyo.
ULuphahla, osanda kuthatha intambo zokuvikela isicoco, ugcizelele ukuthi ngeke babukele phansi iDynamos kunkezo yangoMgqibelo.
“Inkinga esibelayo silungiselela lumdlalo kube yikuswela isikhathi eseneleyo. Bekufuna ukuthi ngabe sithole iviki eyodwa silungiselela ngaphambi komdlalo lo. Sesakhe iqembu elitsha ngemva kokulahlekelwa ngabadlali abamqoka abambalwa.
“Njengeqembu elivikela isicoco, ebelilolonga laphetsheya kwelizwe, kulindelwe okukhulu kithi. Kumele siphumelele, loba sekutheni ngoba yikho okufunwa ngabalandeli bethu,” kutsho uLuphahla.
ISimba Bhora ilahlekelwe ngabadlali abamqoka abanengi ababa lesandla ekunqobeni kwayo iligi ababalisa iSoccer Star of the Year uWalter Musona, Tymon Machope, Tichaona Chipunza loMthokozisi Msebe.
Iqembu leli liphangise ladinga abanye abadlali ukuthi bavale isikhala lesi uDonald Mudadi osuke kuDynamos, uBlessed Ndereki obekuYadah lo-Emmanuel Ziocha laye obekuDynamos.
Umdlalo weCastle Challenge Cup lo uzaqala ngo-2.30 PM. Abathandi labalandeli benguqu abafuna ukubukela, kubikwa bazabhadala i-US$3 kundawo zabantu abanengi, US$5 kuma-Grand Stands le-US$10 ezitulweni zeVIP.
