Online Reporter
YiNtatheli kaMthunywa
ABANTWANA besikolo abathathu bagijinyiselwe esibhedlela ngoLwesithathu ekuseni ngemva kokuba umtshova abakade bewugadile utshaywe yisitimela eMahatshula, koBulawayo.
Umtshova lo ubuthwele abantwana bezikolo ezitshiyeneyo. Kubikwa abafundi bakusimo esingcono okwakhathesi.
Isikhulumi seNational Railways of Zimbabwe (NRZ) uMnumzana Andrew Kunambura uthe balesiqiniseko sokuthi umtshayeli womtshova wehluleke ukulandela isixwayiso sokuthi kumele alinde isitimela sidlule kuqala.
“Iqula le-NRZ lithunyelwe lapho okwenzakale ingozi le. Kutholakale ukuthi umtshayeli womtshova wehluleke ukulandela umthetho othi kumele ame lapho okudlula khona isitimela.
“Izimota ezimbili zifike zama, umtshayeli womtshova wazidlula imota lezi, eyakhe yatshaywa yisitimela.
“Kulimele abantwana abathathu. Bagijinyiselwe esibhedlela njalo sebephephile engozini,” kutsho uMnu Kunambura.
Uxwayise abatshayeli ukuthi bahloniphe imithetho yalapho okudlula khona isitimela.
“Umtshayeli kumele ame endaweni okudlula isitimela, akhangele inhlangothi zombili ukuze aqinisekise ukuthi asikho isitimela esisondelayo. Kumele aqhubeke nxa esesuthisekile ukuthi akula sitimela esizayo.”
