adminSiphethe ingxoxo yethu kuviki ephelileyo sesisizwa ukuthi yahamba njani indaba kaMaliwa yokuthethisa kwakhe ilihlo lenduna uMbengo besetshwaleni koWozola. Sizwile ukuthi sebemtshelile abanakwabo uMaliwa ukuthi wayekhulumeni ngayizolo wabalenhloni njalo watshaywa luvalo.
Umnakwabo lowo waqhubeka emtshela uMaliwa ukuthi waliwa yikudla. Wakwazi ngoqotho uMaliwa ukuthi kuyamala isibili ukudla, ngoba sewake wakhulumela umuntu wesifazana amanyala ngenxa yokuthi utshwala basebubila ekhanda.
Umkhula wakhe lowo wamtshela ukuthi wayezafela etshwaleni. Wakhangela phansi waswela uMaliwa ukuthi wayemthethiselani uNcube. Nxa uNcube ezifundisela umntanakhe, yena uMaliwa kwakumhlupha ngani? Babuya ubuntu kuye. Wathi uzakuya kuNdlovu owayezwe kuthiwa wayefuna ukumcacada ikhanda, ayemncenga ukuthi ayemncengela komdala. Sezwa uNdlovu emtshela ukuthi ulitshapha uMaliwa. Wamkhumbuza ngombuzo ukuthi kwakukanengi ekhuzwa uMaliwa.
Siyezwa kunkulumo kaNdlovu loMaliwa ukuthi uMaliwa lo wayezalwa nguHlekwana. Nanzelela mfundi ukuthi sekungathi sibuyela emuva ngodaba lwethu, kanti kuvele kulotshwa njalo ngezinye izibanga lapha okuthi udaba oluthile lungeniswe kuphela lungatshengiswa isiphetho kuze kube ngemva kwesikhathi. Lamhla udaba lwethu luyabuyela kuSilobile esafunda eMthombothemba. Wayedlula koBulawayo. Babesithi bengafika khona izinini zabo ziphume ezindlini ziyelala kubakhula bazo kwezinye izindlu, ngoba babebahlonipha abantwana.
Kwakulokwakhelana okuhle kubantu bedolobheni lakoBulawayo ngaleso sikhathi. Kodwa sithola ukuthi ngemva kokuba uSilobile esebalekile ekhaya akubanga njalo. UNgenzile wamqegula kwabakibo uSilobile wamusa kwabaziwa nguye. Laye uSilobile kuthiwa wabavika kakhulu bonke abantu abaziyo. Lapha ababelala khona! Lokhu sizakuchaza ngamazwi omlobi. “Nxa umuntu ekwazi ukuthi kuqamelana njani okungabantwana kwengulube akayikuwelula kakhulu umkhumbulo wakhe. Kwakunjalo lakuboSilobile.”
Wathi esafika koBulawayo waba lamahlonyana kodwa laye waze wajayela waba njengabanye behla kuhle ubuthongo endlini lapha kulele khona isilisa lesifazana. Wahoqa isibili laye. Abanye basebethethe. Labo babengena khonapho labomkabo. Umuntu lanxa emubi kwakube lesibanga lapho azihlola khona aphose aguquke ebubini lobo. Zazisiba khona lezozibanga kuSilobile. Siyezwa lapha ukuthi kwake kwafika emkhumbulweni kaSilobile ukuthi okunje kubi.
Kwafika kuye ukuba usethukiwe!
Wayesebona kungcono ukuthi abuyele ekhaya ayeguqa kunina loyise axolise, kuthi nxa bemfulathela aguqele uKhokho amkhalele ukuthi amncengele. Wabihlela ngaphakathi, inhliziyo yakhe yaze yandenda esizibeni senyembezi; ekhaliswa yibunja ayesekhasela kubo. Wafisa lokuthi aluba uNgenzile wayekhona ngabe wambuza ukuthi wamlethelani endaweni enje. Kodwa uNgenzile wayesebuyele eHadlana; lingatshoni engabonwanga eMbijana. Imbijana sizwile ngaphambili ukuba yayiyindawo yobubi obasebuchitha iHadlana.
Aluba uSilobile wazuza omsizayo kusenje ngabe abaphansi bamhawukela, bamkhupha odakeni owayefakwe kulo nguNgenzile. Kodwa waswela omsizayo, watshona odakeni. Kumele sikutsho lamhlanje lapha ukuthi esanda kufika koBulawayo uSilobile bonke babemkhangelela khatshana, bemesaba. Babezwile ukuthi wayengumisi eMangala.
Funda iphephandaba likaZulu uzwe okwalandelayo.
Online Reporter