admin
Ethel Ncube
KULABANTWANA abazalwa kwenye imuli yeKezi asebetshengisele umhlaba ukuthi akudingakali ukuthi uze ube mdala ukuze uqale ibhizimusi nanko phela sebaqala ibhizimusi lokubhaka amakhekhe abawathengisela umphakathi.
Amantombazana la athi u-Elma Mpofu owenza izifundo zikaGiredi 7 lo Cleopatra Ndlovu oku Giredi 5 sebemangalise abantu abanengi ngokuzimisela kanye lobuciko bokubhaka besesebancane.
UMthunywa uxhumane lomama ozala abantwana laba uNkosikazi Meditate Ndlovu oveze ukuba kuyabathokozisa ukubona abantwana besenza umsebenzi omuhle njalo oncomeka kangaka.
“Kuyangijabulisa kakhulu ukubona abantwana bethakazelela ukwenza umsebenzi wezandla besesebancane kanje.
“Sizimisele ukubaphathisa baqhubekele phambili ngokubhaka kwabo. Baqalisa sakudlala bebona amavidiyo avela kuYoutube baqala ukulungisela bencediswa ngubabakazi wabo.
Ngokubhaka kwabo sebenelise ukuthenga isitofu segasi sokusilela ukuba bathenge i-cylinder lezinye nje izinto zabo zokusebenzisa ekubhakeni”.
“Yiloba amavidiyo ababewabukela ayetshengisa abantu ababhaka ngama oveni amankazana la afundiswa ukusebenza bengalayo i-oveni babesebenzisa indlela zesintu zokubhaka ngenkuni kodwa khathesi njengoba sebathenga isitofu segasi esile-oveni umsebenzi wabo usungaba lula,” kutsho uNkosikazi Ndlovu.
Amankazana la abhaka amakhekhe atshiyeneyo, amabhanzi, ama-scones kanye lamabhisikiti abawathengisela umphakathi.
“Saqala sisabukela amavidiyo okubhaka kumakhalekhukhwini kababakazi okwasenza saba lesifiso sokuqala ukubhaka lathi,” kutsho uElma.
Uyisekazi wamantombazana uSilibaziso Moyo uthe ekuqaleni wayengakunaki ukuthi amankazana la alethalenta lokubhaka kodwa wacina esekubona ukuthi ngempela balesipho ngemva kokudla elinye ikhekhe abalibhakayo.
Izakhamizi zakulindawo kukhanya ziyakuthakazelela ukudla amakhekhe abantwana laba nanko phela kubikwa athengwa ngabantu abanengi.
Online Reporter