Zimpapers Sports Hub
NGESIKHATHI iqembu le-Equatorial Guinea licabanga ukuthi selithole ithuba lokuhlasela, belihlangana loCorbin Mthunzi.
Nxa licabanga ukuthi selizafaka ibhola emambuleni belithola uMthunzi evimbe indlela. Lalapho licabanga ukuthi lingabuyela emdlalweni, belithola uMthunzi emi endleleni yalo.
Umdlali wamaWarriors lo nguye obejame wavimba kakhulu emuva lapho akade ebambisane loKevin Moyo enhliziyweni yezokuvikela enkundleni, ngesikhathi amaWarriors etshaya i-Equatorial Guinea 3-0 emdlalweni owadlalelwa eNational Sports Stadium ngoMvulo.
Kazange enze iphutha.
Uthole amabhola aphezulu, wehlula abagadli ekulwisaneni lebhola. Udlale njengomuntu ofanele ukuba kuleyondawo.
Umqeqetshi wamaWarriors uRamon Catala laye umncome kakhulu.
“Udlale kuhle kakhulu. Ngiyajabula. Kumdlali osakhulayo ukudlala ngalindlela emdlalweni okumele siwunqobe, phambili kwabalandeli abanengi njalo ngaphansi kobunzima, kutshengisa ubungcitshi bakhe,” kutsho uCatala.
“UCorbin kazange enze iphutha. Ubekhangele kakhulu emdlalweni njalo ezimisele. Ngiyathokoza kakhulu ngaye. Ulalo ikusasa elihle kakhulu.”
Amazwi okuncoma la aqakathekile evela kumqeqetshi njalo uMthunzi uwafanele.
Kodwa, umdlali lo bekumele abe seMali leqembu lama-Under 23, lapho amaYoung Warriors azazama khona ukulungisa umonakalo wokunqotshwa 3-0 yiMali emdlalweni wokungena kuma-Olympics eLos Angeles ngo2028.
Ngokubizwa kuqembu elikhulu, impilo yalumdlali isuke yaguquka. Njengoba uMunashe Garananga elimele, uCatala ukhethe ukubiza uMthunzi.
Umdlali lo uthe ubonga umqeqetshi ngokumethemba njalo umangaliswe lusekelo lwababukeli abakade besenkundleni yeNational Sports.
“Ngimangaliswe yindlela abalandeli abasamukele njalo abasixhase ngayo. Ngangingakwazi ukuthi abantu beZimbabwe bayithanda kangaka inguqu,” kutsho umdlali lo oleminyaka engu-19 ekhuluma leZimpapers Sports Hub.
UMthunzi wazalelwa, wakhulela eNgilandi.
Uyise uDingulwazi wakhulela koBulawayo engakathutheli e-United Kingdom, lapho afika watshada khona lomama kaCorbin, uKylie Kendall Alexander.
UMthunzi okwakhathesi uhlala e-Ipswich. Imuli yakhe ihlala eBrighton.
“Ubaba lezinye izihlobo zami bangixoxela okunengi ngeZimbabwe. Ngikuthandile konke ngokudlalela amaWarriors.”
Umdlalo wokuqala kaMthunzi egqoke ijesi leZimbabwe waba ngoNkwenkwezi, ngesikhathi eyingxenye yeqembu lamaWarriors elathatha inkezo yokuqala yeMukuru Four Nations Cup e-Obed Itani Chilume Stadium, eFrancistown.
“Abalandeli beZimbabwe bayahlanya ngebhola, njalo ngiyakuthanda lokho.”
Lanxa efisa ukuqhubeka ekhuphuka ezigabeni zebhola ku-Ipswich, uMthunzi uthi ulesifiso sokwenza okunengi njalo leqembu lesizwe leZimbabwe.
“Ngifuna ukunqoba okunengi engingakwenelisa kumaWarriors njalo ngenze konke okusemandleni ami. Ngithemba ukuthi sizanqoba eminye imincintiswano eminengi esikhathini esizayo,” kutsho lumdlali.
Ukhulume njalo ngohambo lwakhe lwebhola ku-Ipswich Town Under-21.
“Kuhle kakhulu. Ngilabaqeqetshi abahle labadlali engidlala labo bangizise kakhulu ekutholeni leli thuba. Angingeke ngibabonge ngokweneleyo.”
Umdlali lo odlalela i-Ipswich Town uthe usebenzise isikhathi sakhe eqenjini elikhulu lamaWarriors ukuthi afunde kubadlali asebelesikhathi emdlalweni webhola, njalo khathesi ulethemba lokudlulisela ulwazi alutholileyo kwabanye abadlali bamaYoung Warriors.