UMTHUNYWA

‘Thatha, ngokwakho Kaindu’

Nkosilathi Sibanda

UMBUZO omkhulu ngothi: Isicoco sizakuya eKwekwe kumbe iScottland izaqhubeka ibusa?

Umncintiswano weligi yeCastle Lager Premiership ka-2026 ufika emaphethelweni kulimpelaviki lapho okuzalindelwa impumela yemidlalo yokucina ezaveza iqembu elizathatha isicoco.

IHardrock leScottland yizo ezilwela isicoco njalo zehlukaniswe yimiklomelo emibili kuphela, okwenza ukuthi imidlalo yayo yokucina ibe ngeqakatheke kakhulu.

IHardrock, eqeqetshwa nguKelvin Kaindu, yiyo ehlezi phezu kwengalane ngemiklomelo engu-70 njalo izadibana leFC Platinum, kuthi iScottland, eqeqetshwa nguPeter Ndlovu isendaweni yesibili ilemiklomelo engu-68 izangqikilana le-Triangle United.

Lokhu kutsho ukuthi iHardrock isethubeni elingcono lokuthatha isicoco, kodwa akumelanga ithathe umdlalo wayo wokucina lula ngoba loba yikuphi ukukhubeka kungayiphuca ithuba lokuba yintshantshu yeligi.

Iqembu leKwekwe leli selinqobe imidlalo engu-21 kwengu-33 eliyidlalileyo, ladlala ngokulingana kasikhombisa njalo lanqotshwa kahlanu. Selifake amabhola angu-57 emambuleni ezitha njalo langenelwa ngangu-21, lilomehluko wamabhola angu-36.

Lizamukela iFC Platinum kaThabo Senong, esendaweni yesitshiyagalombili ilemiklomelo engu-46, lisazi ukuthi ukunqoba kuzaqinisa amathuba alo okuphakamisa isicoco.

Ngakolunye uhlangothi, iScottland, intshantshu zika-2025 azikalahli ithemba. Iqembu leli selinqobe imidlalo engu-19, ladlala ngokulingana ka-11 njalo lanqotshwa kathathu kuphela.

Selifake amabhola angu-50 emambuleni njalo langenelwa ngangu-11, okuyisilinganiso esihle kakhulu sokuvikela phakathi kwamaqembu amabili alwela isicoco.

Kodwa umsebenzi walo awulula njengoba kumele linqobe iTriangle United, ehlezi endaweni yesi-16 ngemiklomelo engu-26. Okuqakathekileyo empini yesicoco yikuthi iScottland ilomehluko wamabhola ongcono kuleHardrock. IScottland ilomehluko wamabhola angu-39, kuthi iHardrock ile-36.

Lokhu kutsho ukuthi nxa iScottland inganqoba iTriangle, iHardrock yona idlale ngokulingana leFC Platinum, amaqembu la azalingana ngemiklomelo engu-71. Kulokhu, iScottland ingathatha isicoco ngenxa yokuba lomehluko wamabhola ongcono.

Ngakho iHardrock kayidingi nje ukudlala ngokulingana, kodwa kumele inqobe.
Ngakolunye uhlangothi, iScottland kumele yenze umsebenzi wayo wokunqoba, iphinde ilindele ukuthi iFC Platinum iyimise iHardrock.

Kukhangelelwe ukuthi iHardrock izasebenzisa ithuba lokudlalela ekhaya ukuze iqede umsebenzi ngemfanelo, ikakhulu njengoba ifuna ukubhala imbali yokuthatha isicoco sePremiership.

Kodwa iScottland, eyiyo intshantshu evikela isicoco, ifuna ukuqinisekisa ukuthi iyaqhubeka ibusa kubhola lakuleli.

Ngakho amehlo abathandi bebhola azabe ethe nhlo emidlalweni le, kulindelwe ukubona ukuthi iHardrock izabhala imbali entsha yini kumbe iScottland izaphinda iphakamise isicoco.

UKaindu ukhangelelwe ukuthi aveze amacebo akhe okuqeqetsha emdlalweni lo oqakatheke kangaka, njengoba iqembu lakhe lilethuba lokuthatha isicoco.

Imidlalo
NgoMgqibelo: Herentals College FC vs ZPC Kariba FC (Heart Stadium), TelOne FC vs Bulawayo Chiefs FC (Ascot Stadium), FC Hunters vs Dynamos FC, (Rufaro Stadium), Ngezi Platinum Stars FC vs Simba Bhora FC, (Baobab Stadium), Agama FC vs Highlanders FC, (Wadzanayi Stadium), Triangle United FC vs Scottland FC (Gibbo Stadium), Hardrock FC vs FC Platinum (Chahwanda Stadium), (Manica Diamonds FC vs MWOS FC, (Sakubva Stadium)
NgeSonto: CAPS United FC vs Chicken Inn FC (Rufaro Stadium)