Vusumuzi Dube
Nkosilathi Sibanda
“INTO ekhona lapha yikuthi angifuni ukukhuluma indaba zabantu. Ngifuna abantu bakwazi ngendaba yami yokukhipha ingoma ebizwa ngokuthi Tatazela, engiyihlabele ngincediswa nguMa9Nine. Asibunandi bayo…”
Langamazwi kasaziwayo othanda ukujabulisa abantu ngamahlaya enkundleni zokuxhumana, kuSocial Media, uSipho Mercent Nyathi, osetshengise ukuba uphinda abe lelinye ithalenta lokucula.
Ukuzwa uNyathi ehlabela ingoma zakhe kuzamangaza abantu abanengi, kubatshiye betshayana izandla, bevuma njalo ukuthi isiphiwo ulaso.
UNyathi, odume ngokuthi kathandi ukukhuluma indabazabantu, ungene estudiyo lomhlabeleli uMa9Nine, bapheka ingoma ye-Rhumba ethi: Tatazela,.
Le yingoma yakhe yakuqala lokhe waqalisa ukwaziwa njengomjabulisi wabantu.
Ekhuluma lephephandaba likazulu ngoLwesihlanu emini, uNyathi uchaze ukuba ufuna ukukhulula inhliziyo zabantu ngamaphimbo amnandi.
“Owami umsebenzi liyawazi. Kulingoma, sikhuluma ngokuzijabulisa lokugida nje kuhlangene njengoba impilo inzima kanje. Siphila impilo esiyibolekileyo ngakho kumele sijabule.
“Umqondo wokusebenzisa umdumo we-rhumba wavela ekuthini sesifuna ukuzama into entsha, umdumo otshisayo njengabo saziwayo koBulawayo,” nguNyathi lo.
Ubike ukuba ingoma le yaprojuswa nguTK njalo lenengi labaculi abakoBulawayo lakwezinye indawo bababaza ithalenta lobuciko obenziweyo.
Kulandela ukuphuma kwengoma yakhe, uNyathi uthe kunengi okuzayo lonyaka ngoba ukhangelele ukwethula idlalade.
“Angifuni ukukhuluma okunengi okwamanje, kodwa idlalade le-rhumba liyeza.
Kusenjalo, uNyathi utshele iphephandaba likazulu ukuba usekhethwe njenge-brand ambassador yenkundla yeChill and Que Pool Hall, lapho okudlalelwa khona i-pool koBulawayo.
“Ngiyajabula kakhulu ngokuthi ngikhethwe njenge-ambassador yeChill and Que Pool Hall, okuyinto engithobayo kakhulu njalo engikhuthazayo njengomculi. Lonyaka sizaqhubeka sisebenza siphakamisa isigaba sakithi, sithabise abantu bakithi njalo sivule amathuba.”
Online Reporter