admin
Wayne Ncube
KUBUKEKA sengathi abahlabeleli abanengi abazaphatheka kumncintiswano we-Old Mutual Amazing Voices ngomnyaka ozayo badabuka koBulawayo.
Umncintiswano wabahlabeleli lo osungulwe yinkampani yeOld Mutual imanyene le Multichoice Zimbabwe uzabe udinga abahlabeleli abalesiphiwo sokuhlabelela esingaphezulu kwabantu abanengi njalo bazakube beqondiswa ngabanye abahlabeleli abakhulu abagoqela uSelmor Mtukudzi owaziwa kakhulu kwezokuhlabela. “USelmor uhamba phambili kwezokulungiselela uhambo lokudinga abalezipho zokuhlabela. Umncintiswano lo kukhangelelwe ukuthi unikeze intshatshu kwabasakhulayo ithuba lokuzibonakalisa baphinde babelodumo,” kutsho uLiz Dziva, ongu-Publicity and Public Relations Manager wenkampani yeMultichoice Zimbabwe.
I-Old Mutual Amazing Voices ngumncintiswano ozaphathisa abatsha ukuthi bafinyelele amaphupho abo okuhlabelela njalo uzakube usakazwa ku-DStv ngomnyaka ka-2020.
Amazwe azaphatheka kumncintiswano lo mane njalo athi, i-Zimbabwe, South Africa, Ghana kanye leKenya.
USelmor uthe umsebenzi wokukhetha abazaphatheka kumncintiswano lo ubumkhulu sibili kodwa uzizwa ebusisekile ukuba yingxenye yalabo abazaqondisa abahlabeleli balumncintiswano.
Uthe abantu abeza kuma-auditions banengi kakhulu njalo koBulawayo kukhanya kweza intshantshu ezingabuzwayo.
“Abeza kuma-auditions banengi kakhulu njalo koBulawayo kweza ezinkulu zakhona.
“Ngethemba iqembu elizanqoba ngomnyaka ozayo lizayiletha ekhaya imali engange US$100 000 njalo ngiyaziqhenya ngokuthi ilizwe leZimbabwe lalo liphiwe ithuba lokuphatheka kulumncintiswano,” kuphetha uSelmor.
Online Reporter