Online Reporter
Fungai Muderere
UMGADLI kumdlalo wenguqu uMalvin Hwata uthe wafika wathwala nzima ukuthi athole umdlalo kuSimba Bhora, ngenxa yokwanda kwabadlali bohlonzi kuleliqembu.
UHwata usephenduka kuChicken Inn njalo ubika ukuba kafuni ukuthi akhuhle ibhentshi. Wasuka kumaGamecocks ekuqaleni kwesizini yalonyaka.
Ekhuluma leZimpapers Sports Hub kuliviki, uHwata uthe wananzelela ukuthi wayelomthwalo omkhulu kuSimba Bhora, nanko kwakumele azitshengisele ngezinga eliphezulu ukuze aabaqeqetshi basuthiseke ngaye.
“Kwakungekho lula ngale kuSimba Bhora. Kumele uhlale ulempumela enhle ekulolongeni ukuze abaqeqetshi bakholwe ukuthi ngempela ungcono kulabanye. Ngibona angathi umthwalo lo usuke wabamkhulu kimi, njengoba ngase ngidlala imizuzu engedluli elitshumi kumidlalo engangikhethwa kuyo,” kutsho umdlali lo.
Uqhubeke wathi: “Ngacina ngadela, ngibona ukuthi ngingaqeda umnyaka ngikhuhla igedi. Ngakhulumisana labaqeqetshi labaxhasi bethimu, ngabika indaba yami yokuthi bangivumele ngidinge elinye iqembu lokudlalela.
Safika isivumelwano sokuthi ngibolekwe kuChicken Inn.
“IChicken Inn likhaya kimi njalo ngifisa ukuthi ngincedise ukuthi liphenduke kuzikhathi zayo zakudala, lapho elinqoba khona imidlalo.”
Umdlali lo ukhangelelwe ukuthi adlale ngokuhlangana kakuhle loLynoth Chikuhwa, obedlalela iScottland FC phambili kwenkundla. Kulindwe ukuthi alikhabe ibhola, eliqhuba njalo loBrian Muza loMichael Charamba.
Kulisizini amaGamecocks aqale esadalala, enqotshwa ekhaya layo eLuveve Stadium, lapho esinqobe khona kathathu.
