Online Reporter
Fungai Muderere
ABANTU sebekubona ukubaluleka kwempilakahle ngokuqinisa imizimba yabo nanko phela izakhamizi zeNkulumane sezikhuthalele ukwenza imidlalo ye-aerobics, kuhloswe ukukhuthaza impilakahle.
Ngosuku lwe-Africa, inengi labantu abahlala kulindawo babuthane enzikini yamavinkili alodumo koMunyoro, lapho abaphatheke khona kunhlelo ze-aerobics.
Bekuhlangene abasakhulayo, izalukazi lamaxhegu njalo bekukhona labowindi labatshayeli bemitshova bonke abachithe isikhathi bezama ukwelula amathambo.
Uhlelo lwe-aerobics lolu luqhutshwe liqula leFitSquad ihambisana lokhansila wendawo.
Uhlelo beluqhutshwa ngaphansi kwendikimba ethi “Impilakahle Yakho Yinotho Yakho”.
Omunye wabahleli balumsebenzi, uCalvin Nkomo, uthe labo bamangaliswe lusekelo olubekhona ngokuza kwabantu abanengi.
Uthe ukubuthana lokhu kutshengisele ukuba umkhankaso wokuqinisa imizimba usufinyelele abantu abanengi lokuthi inengi selithinteka ngokunanzelela ukuthi kuqakathekile ukugcina umzimba uphilile ngaso sonke isikhathi.
“Sithanda ukubonga izakhamizi ezamukele ngobunengi ama-aerobics la lokutshengisa umoya wokubambana lokusebenzisana emphakathini.
“Lokhu bekungasi ma-aerobics kuphela. Bekuyindlela yokuhlanganisa umphakathi, ukunanza i-Africa Day lokukhuthaza ukuphila ngendlela enceda impilakahle ebantwini,” kutsho uNkomo.
“Kumele kubeyinto esiyiqhuba maviki onke nxa kusenza. Okuthabisayo yikuthi singabantu abatshiyeneyo okugoqela intsha labadala. Kuhle lokhu.”
Izakhamizi zeTsholotsho zincome loluhlelo, zibika ukuthi lubeyimpumelelo.
“Sijabule kakhulu. Siqinise imizimba, sehlisa amafutha. Bekumnandi kakhulu ngoba unike abantu ithuba lokuxhumana, ukufundisana ngezempilakahle lokwakha ubudlelwano obuhle emphakathini,” kutsho uSimanga Sihwa ohlala kulindawo.
IMunyoro Shopping Complex iguquke yaba yindawo ephithizelayo njengoba abantu behlangane ngokubambana ukunanza iAfrica Day, betshengisa umoya wokubambana ngokusebenzisa impilakahle.
