Online Reporter
Ugwalo: Emfuleni wezinyembezi olwalotshwa ngu Ezekiel S K Hleza
Ophezulu Stinta
Siqhuba ugwalo lwethu selulanda emaphethelweni, loba singakabhobokeli kuvutho ndaba, singakaboni impumela yezithukuthuku, zegazi kukanti kumele ivele ngemva kwezinhlungu ezingaka.
Phakathi kwesahluko setshumi lambili phakathi kweguma lapho uMaMoyo ahlezi khona ngokuzola okukhulu loMaNyathi, kucaca nje ebusweni ukuthi babesidla usizi lodwa, kambe zingaka izinsizi asebedlule kuzo asebengene kuzo langenzalo yabo kuhela ethunjini.
Ngeviki edluleyo sike saxoxa ngomalukazana kaMaMoyo ongelanhlonipho olobuntu bakhe nje obungachazekiyo lokuthi kungathiwa yibuntu bani, inyamazana uqobo lwayo.
Imbeko eyasala ehlathini yaginywa yizilwane, kambe azongenisa ukungcola kwakhe emzini wabantu ngendlela eyeyisa kangaka kwakusalani lokuthi abonane lesotsha lakhe phandle kweguma labantu.
USpinoza wabuza ngokuzehlisa okukhulu kakhulu wazenza isiwula kodwa elawo amandla wonke, ngalokhu akubona kusenzakala phakathi kweguma likaMaMoyo. Wabona isithutha sesotsha elathi selithatheka ngokuganga komhlaba labeka isikhali kude le, isotsha lisotsha ngesikhali, hatshi leli elibeka phansi isikhali ligaxe isifazana.
USpinoza wadubula phezulu ngombhobho esethusela kwangikhona kusithi qaqabu phezu kwaleli sotsha ndini elaphuma linqunu endlini yabanikazi ligwaze umhlaba elikaThixo. Pho lalivele lisacabanga pho, lalizagijima lifike ngaphi lingasela lempahla zokugqoka lezi lona libhekane lohambo olukhulu kangaka.
Wathi ebona nje ukuthi phandle lapha kwasekunzima, wawuvula umbhobho wahaza indawo yonke engasazi lokuthi wenzani, sezama ukuzikhupha emjibileni. Wathi nje ethi uzama ukweqa ucingo uSpinoza wayikhulula iP.K ngokuphazima kwelihlo indoda yaphangalala phansi yavalelisa umhlaba.
Iqhawe kalifi lula, loba liqhatsha nje lalizama ukuvuka lilande umbhobho walo, masinyane omunye wahle wafika wamjuqa ngengqamu waphangalala. Abafana beganga bangena endlini bathola inkosikazi kaSidingani ingumhlanga iqhuqha okwamagama. UMaMoyo ngenhliziyo yomusa lothando kanye lesihelo waxolisa ebafaneni ngelithi bazwele umalukazana wakhe, kodwa umbuzo wawusithi ngumalukazana ngaliphi phezu kwalokho okudutshulwe phandle.
Baphuma laye uMaNcube ehamba phambi kwabo laye engagqokanga, kwezwakala ukukhala kombhobho, yaphela indaba yakhe.
